Tura, Nov 17: Tura Government College Field-ni wilwilao donggipa Te•teng A•ja gittimo bang•bata bijoli krongrangan maram cha•e be•na sie dongtokengahani gimin ian jolo songdongenggipa manderangna kenchakna nangani ong•enga ine Federation of Khasi Jaintia & Garo People (FKJGP) Garo Hills Zone parakatenba, ia bijoli krongrangko ta•raken bodolchina gita MeECL official-rangko didiataha.
Iani bidingo Tura MeECL-ni additional chief engineer-na badi ka•e sedoatengon, Te•teng A•jao bilakbegipa 11 KV bijoli silitingrangko salgipa krong ge•gnian maram cha•e be•na siengaha aro ian jolo songdongenggipa manderangna namen kenchakna nangani ong•enga ine FKJGP Garo Hills Zone-ni president Pritam Arengh parakataha.
Tura Govt College Field-oni Lower Mission Compound-ona bijoli silitingko salanggipa bijoli krongba maram cha•e be•angengaha aro ia krongba jolo songdongenggipa manderangna kenchakna nangani ong•enga ineba ua parakataha.
Te•teng A•jao donggipa St Anthony’s School-ni janggilchipak, chi jokna tarigipa nalao bijoli krong ge•sako songaha aro ia bijoli krongba manderangna kenchakna nangani ong•enga ine janapatengon, ia pilak bijoli krongrangkon ta•rake bodolchina gita FKJGP Garo Hills Zone-ni president didiataha.
