Tura, Dec 21: Ia sal somoirango Tura jillao, mongsongbate bazar antidamrango cha·uanirang batroroengani a·sel dokkan dakgiparang mikrakbatna nangtokenga ine nikna man·aha.
Pangnande cha·ugiparang, pringwalni somoirangosa, manderang tusipekmitingrangosa cha·urongbatachim indiba da·ororo Krismasna dokkanrango namen jakchakbegijako nikna man·engani gimin cha·ugiparang, manderangni kam ka·chichamiting somoirangon cha·una gita cholrangko ra·skaenga ine nikna man·aha.
Iandake attamni 6:00 bajini somoio maikai cha·ugipa saksa, dokkan damsaoniko cha·ue ra·aha, iani CCTV-ko Hub News-ba man·aha.
Ia CCTV-oniko nikna man·ani gitade, dokkano kam ka·giparang, manderangna dangdike on·engmiting somoio, cha·ugipa saksa, dokkano napenba, tangka donchakgipa drawer-oniko tangkarangko ra·e, ua biaponi ma·siatgija ong·kate katangna man·aha. Dokkan chipani somoio hisap melijani gimin dokkan nokgipa, CCTV-ko niosa, uni dokkanoniko cha·uako ua ma·sina man·aha.
Ia obostani bidingo dokkanni manager, Hub News baksa agangrikengon, dokkano tangkarangko ra·timenggipa mande, sambao donggipa sam dokkanoniko sam ra·na re·angmitingosa ia obosta ong·aha ine parakataha. Ia obostani bidingo police-rangna u·iatahama ine sing·on, cha·ugipani mikkangko CCTV-o rongtale man·jahani gimin uamang FIR ka·jaha ine dokkani manager aganskaaha.
Minggipin a·sel ong·anio, Tura Bazar-ni MR Store minggipa dokkanonikoba apsan daken adita salrangna skang cha·uaha ine dokkan nokgipa, Hub News-na aganaha. Dokkan nokgipani aganani gitade, uni dokkan mikkango bolchi tarigipa do·garang be·ako nikeani gimin ua dokkan ning·chi napangon, uni dokkanni tangkarang aro bosturang gimaaha ine ua nikeaha.
Ia obostana agreba, masjid sambao donggipa dokkanonikoba apsan daken cha·una jotton ka·ahachim indiba chu·sokangna man·jaha ine dokkan nokgipa aganaha. Dokkan nokgipani aganani gitade, uni dokkano bolni do·garangko saoba okna jotton ka·aha ine ua attamni 5:00 bajimango phone ka·atako man·soaha aro ua bakan dokkanona re·angon, saoba uni dokkano napna jotton ka·ahachim indiba chu·sokna man·jaha ine ua nikna man·aha.
Tura jillao iandake dokkanrangoniko cha·uana agreba, scooty, gari battery aro manderangni ma·manti gam-jinrangko cha·uanirangko knasona man·enga.
Na·simang iakoba nina man·gen:
Na·simang iakoba poraina man·gen: EJH-o IED gopretanina sakgniko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
