Tura, Oct 19: Budbar salo, Meghalaya a•dokni Chief Minister Conrad K Sangma, Tura-o gital rikgipa PHE-ni Sub Divisional Office building-ko nokdonggae on•angaha.
Tura-ni PHE Sub-Division-ara Garo Hills-o gitchambatsranggipa sub-division-rangoni damsa ong•enga aro ia sub-division-ni ning•o Rongram, Rerapara, Gambegre aro Betasing baksana Selsella-ni mitam bakrangkoba man•engachim.
Ia gital building-ko rikna gita State Plan-ni ning•o gong crore 1 lak 57 hajal 59-ko 2019 bilsion chame on•ahachim. Ia gital building ba nokko rikna gita 2019 bilsini November jaon work order-ko on•ahachim indiba COVID-ni a•sel kamrangko 2021 bilsiosa a•bachengataha aro ia 2022 bilsion matchotataha.
Ia gital office building-ko nokdonggae on•angani somoio a•dokni Chief Minister, jinmana aganprakangengon, PHE department-ni kamrangko namdapatna gita ia gital nokko matchotate on•na man•ahani gimin an•tangni kusi ong•aniko parakangaha.
2018 bilsio PHE department, tangka paisarang chu•onga gita dongjae jillani manderangna chirangko sokate on•anio neng•nikanirangko man•na nangengachim ine janapatengon, batanggimin bilsibri atani gisepon PHE department, a•dok sorkarini dal•batsranggipa department-rangoni ge•sa ong•aha ine Chief Minister parakataha.
Re•anggipa October-ni 2 tariko Gandhi Jayanti-ko maniani somoio Jal Jeevan Mission-ni kamrangna a•songni President, Meghalaya a•dokni PHE department-na dingtangmancha upattiko on•aha ineba Sangma, an•tangni kusi ong•aniko parakataha.
