Tura, Oct 10: United A·chik Liberation Army (UALA) bobil dolni chairman gitcham Novembirth Ch Marak, mikkang 2023 bilsini eleksino South Garo Hills, Chokpot constituency-o susana mangsongenga ine koborna u·iataha.
Eleksino susana miksonganiko koborna aganatani gita, songni bi·sarangna uni adita ge skulrangko kulie on·gipa biap Chokpot jolo re·baenggipa eleksino manderangni chakpaaniko am·anggen ine Novembirth Marak parakataha.
Bobil dolni gitcham dilgipani aganatani gitade, a·dokko man·chengaoni bilsi 50 batpilengoba aro bilsi-bonga prako a·jatangna dangdike on·china seoke watatengoba maming namdapanirang dongkuja ine janapatan baksa, Chokpot a·jana minggittam nangchongmotgiparang komikuenga uarangara, namgipa rama-jal·langrang, nosto ong·gimin skul nokrangko taridapna nanganirang, sana-bananio chu·onggijanirang, jerangkon batanggimin changrango manderangni seoke watatgipa dilgiparang chu·sokatjaha iarang pilakkon da·o nirokatna nangchongmotenga ineba ua agandapataha.
Eleksino susana gita tik ka·na skangan, a·jatango bi·sarangni namgnina skulrangko kulie on·anirangkoba manderang mikrontangchi nikaha ine a·kangatan baksa, eleksinnni result-rang namoba ba namjaoba joltangni bi·sarangna lekka-porako on·anion ua gisik on·e kamrangko ka·angkugen ineba bobil dolni gitcham dilgipa aganangkuaha.
Janapna gita, batanggimin somoio GNLA bobil dolko bikotchenggipao Novembirth Marak-ba dolni saksa membor ong·paa aro dolni general secretary ong·chenggipaba ong·achim. Police-rangni jakchi rim·a cha·ani ja·man ua pattoko chipatakoba man·aha, uandake ja·mano an·tangan chairman ong·e aro Singbirth Marak jekon Norok X Momin ine mingklaka uko dolni commander-na seoke UALA bobil dolko bikotskaahachim.
Williamnagar pattokko chadrapa baksana maming silchidareko jakbita grigipa pattoko nitimgipa sakgni warden-rangko so·otanichi UALA bobil dolko namgijanio mingsingangna gita a·bachengaha. Diwali-ko maniani somoio, Goalpara-o Rabha-rangni songdonggipa Gendabari songoni Rabha jat saksniko so·otanioba uamangni jak dongachim.
Uandake, adita so·so-jengjengko ong·atani ja·man, Meghalaya sorkari aro bobil dolni gisepo chandal mittugrikaniko dakna soi ka·grikanichi UALA bodil dolko bon·atna man·aha aro uni sipairang gimikan namgipa janggi tangbewalona pil·batokahachim, indiba uamangoni saksa Norok Momin, 2017 bilsio North Garo Hills police-ni ja·kol sanne sipairangni jako so·otako man·kujana kingkingde ua ong·gija kamkon ka·angkuaha aro chadamberangko dolona rim·daproroe gital bobil dol, United A·chik National Front (UANF)-ko bikotskaahachim.
