Shillong, Nov 11: Assam aro Meghalaya a•dok damgnini gisepo meligrikna man•jaenggipa Block II-ni Umpaler songo donggipa stadium-ko Assam sorkari, kulie on•na miksongenga ine matnangenba, iani bidingo ta•raken niatchina gita Mawhati constituency-ni MDC Charles Marngar, Bristibar salo Meghalaya a•dokni Chief Minister Conrad K Sangma-ko didiataha.
Iani bidingo kobor ra•timgiparangna talataniko on•angengon, re•anggipa August jani 26 tariko Ri Bhoi a•jani DC aro Hamren West Karbi Anglong-ni DC, apsan tom•e chanchirimanio pangchake, ia jolrango Meghalaya aro Assam a•dok damgnian maming kamrangko ka•kujana gita Hamren-ni DC an•tangan janapahachim ine Mawhati-ni MDC parakataha.
Indake ong•genchimoba, a•dok damgnini gisepo ku•rachakgrikaniko pe•e Assam sorkari, Block-II-ni Umpaler songo donggipa stadium-ko kulie on•na sienganiko ua Bristibar salo kobor man•soaha une Marngar parakataha.
Block II-ni Umpaler songara Assam aro Meghalaya a•dok damgnini meligrikna man•jaenggipa dam 12 songrangoni damsa ong•achim.
Indake ong•engon, Assam sorkari, Meghalaya a•dokni gam-jinrangko ra•sekna jotton ka•enga ine Marngar matnangatenba, iani bidingo Assam-ni CM baksa agangrikchina ua Meghalaya a•dokni CM aro Deputy CM-ko didiataha.
