Dibrugarh, May 8: Bristibar salo, Dibrugarh police aro Tinsukia police bakrime am∙sandianirangko dakenba mandeni be∙enni bakrangko badingna kam ka∙giparangko sandie man∙aha aro sakbri badingsrukna dakchake on∙giparangko Margherita aro Dibrugarh-oniko rim∙aha. Rim∙ako man∙giparangara – Zakir Hussain (53), Shankar Chetanu (28), Samir Pal (37) aro Gopal Roy (31) ong∙a. Samir Pal aro Gopal Roy Dibrugarh-o songdonggiparang ong∙a aro Zakir Hussain aro Shankar Chentanu Margherita-ni Veneer Mill jolo songdonggiparang ong∙a ine koborko man∙aha.
Police-ni parakatani gitade, matnangako man∙gipa manderang Margherita-o songdonggipa bilsi 35 ong∙gipa Rajib Dey minggipa mandena tangkarangko aro janggi tangani cholko on∙gen ine tol∙e ku∙chakenba uni ka∙rongteko palchina togie ropengachim. Iandake mandeni be∙enni bakrangko niam gri badingsrukanirangko Assam-ni dingtang dingtang biaprango nikna man∙enga ine koborrangko man∙aha.
Rajib Dey-ni nokdangni manderangni badi ka∙anio pangchake, Tinsukia-ni Deputy Superintendent of Police Faiz Ahmed am∙sandianirangko a∙bachengataha. Uandake Dibrugarh aro Tinsukia-ni dingtang dingtang biaprangoniko sakbri manderangko rim∙aha.
Indake ong∙engon, Margherita police station-o police dolrang badi ka∙angaha aro iani bidingo sandirikkitanirangko da∙o dakenga aro hospital-rang, medical staff, ba doctor-rang ia obostao jak dongama dongja sandienga.
Upper Assam-ni cha bagan jolrango iandake niam gri ka∙rongte badingsrukanirangko bang∙en dakenga aro bang∙bata somoion badingsrukgiparang kangal-cholgrigipa nokdangrangni manderangko man∙na mongsongbate jotton ka∙enga ine koborrangko man∙soaha.
Na·simang iakoba nina man·gen:
Na·simang iakoba poraina man·gen: Australian High Commissioner M’laya Guv-ko gronge chanchirimanirangko dakanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
