Shillong, Oct 5: Ex Khasi Hills Autonomous District Council (KHADC)-ni CEM gitcham Pa Ardent Miller Basaiawmoit, “Voice of the People” ine bimingko done gital political dolko a·doko bikottaina am·enganiko Mongolbar salo parakataha.
Ia gital dolko re·baenggipa November jao official-ni gita parakatgen ine dolni padot Pa Ardent Basaiawmoit u·iatangenba a·dokni politics-o pilakni gita dingtanganiko manderang nangnikengani gimin ia dolni miksonge kamko ka·anian namgipa sorkariko rikani aro namgipa politics-ko ra·baani gimin ong·gen ineba ua parakataha.
A·joltangni gital political dolko bikotenggipao ka·dongchakchina gita a·dokni manderangko mol·molangengon, a·dokni politics-o dingtanganiko manderang nangniktokenga aro chadamberang kam gri ong·tokengani a·sel uamangni gisepo ka·a nangani aro chaktokgijanirang ong·enga aro mamingo ka·dongani gri ong·enga uni gimin chingni dol dingtanggipa policy-rangko ra·bae ia pilak neng·nikanirangko namatna nangnikenga aro ia gital dolan manderangni nangnikanikoba chu·sokate on·na man·gen ine chinga chu·gimik ka·dongsoenga ineba ua aganangkuaha.
Indake ong·engon, ia gital bikotenggipa dolo kam ka·nasienggiparangni bimingrangkoba Pa Ardent parakatjolaha, uamangara — President-na MLA, MDC aro CEM gitcham Pa Ardent Miller Basaiawmoit, Vice President-na St Anthony’s College-ni kamtangoni neng·takgimin Professor Dr. Kara H Shen,
General Secretary-na NEHU, M.Com, MA (Economics), PhD (Economics)-ni Assistant Professor Dr. Ricky A J Syngkon, Asst. General Secretary aro Spokesperson-na Synod College-ni Assistant Professor (Political Science) Dr. Batskhem Myrboh, Finance Secretary-na Woodland Hospital-o Medical Doctor ong·gipa Dr. Peter Daniel S Khariong, Organising Secretary-na IIM (Bangalore)-o Graduate ong·bagipa, Allahabad University-o Leadership Management-ko poraibagipa, World Vision-ni Community Development Facilitator gitcham Mr. Winston Tony Lyngdoh-maang ong·a.
