Shillong, April 6: Sorkarini kamrangna mande rim·anio da·o ja·rikenggipa Job Reservation Policy-ko nipiltaina ba taridapna nangengani gimin memborangni gisepo jera-ra·aniko ba agan-chanchirimaniko dakna gita a·dokni assembly-o Special Session-ko ong·atchina gita sorkario mol·molangenba, Voice of the People Party (VPP), Brisitibar salo, a·dokni skotong minister Pa Conrad K Sangma-na chittiko on·angaha.
Indake ong·oba, a·dokni skotong minister an·tangde biaptango ong·jani gimin, MLA Pa Brighstarwell Marbaniang baksana VPP dolni dilgipa Dr Ricky Syngkon, ua chittiko Secretariat-oni Chief Minister office-ni officialni jako on·e donbaskaaha.
Official-rangni jako chittiko on·e donbaani ja·man kobor ra·timgiparangna aganengon, Dr Syngkon, a·doko ra·gatnasienggipa Roster system aro a·dokni Job Reservation Policy-ni mamlara a·dokni manderangna namen chanchina nangchongmotgipa ong·engani gimin iani bidingo assembly-o jinma chanchirimaniko aro agan-jera ra·anirangko dakanichi ra·chakaniko dakna gita nangenga ine parakataha.
Uasan ong·aigija, re·anggipa April 3 tariko PIL No. 2-na High Court-ni mande ra·ako man·na kragipa Bench-ni hukumko on·anggipaoba, ian policy-ni mamlarang ong·ani gimin legislature aro executive-rangna pakwate iani gimin chanchirime tik ka·aniko dakchina gita janapangaha, ineba Dr Syngkon koborna aganangaha.
