Tura, May 24: South Garo Hills a·jani Dabalgre songo, Wari Chora-ona dakanggipa ramao gital tarigipa silgrakni jang·keko Sonibar salo, Garo Hills Autonomous District Council (GHADC)-ni Chief Executive Membor (CEM), gipin executive membor-rangni dongpaanio oprake on·angaha.
Ia jang·keni bakroaniara meter 400-na bata aro ia silgrakni jang·keko, Wari Chora-ko nina re·baenggipa aro songni manderangna naljokaniko on·na miksonganio tariaha.
Ia silgrakni gital jang·keko tarianiara, samba jolrango donggipa songrangona re·ruraaniko altubatatasan ong·aigija dingtang dingtang biaprangoni Wari Chora-ko nina re·baenggipa manderangna, naljokani aro re·a doanio altubatatanikoba on·gnok.
Ia gital jang·keko oprake on·angani somoio GHADC-ni CEM Dhormonath Ch Sangma aganprakangengon, ia gital jang·keko tarie on·aniara, songo noko tourism-ko tang·doatna, re·a doaniko namdapatna aro Garo Hills-o pangkamgipa namroro silroroaniko ra·bana GHADC-ni kam ka·aniko mesokani ong·enga ine parakangaha.
Ia silni jang·keko tarianio, samtangtango donggipa bol wa·arangko den·gija aro a·arangko bakgijasa a·kol cho·mangmange tariaiaha ine talataniko on·angengon, ian South Garo Hills a·jao tourism-ko tang·doatna dakchakanisan ong·aigija songni nokni manderangna janggi tangani cholrangko on·na gitaba dakchakgen ine Sangma aganaha.
Ia jang·keko oprake on·anganio dingtang dingtang executive member-rangba aganprakengon, ia kamko chu·sokatanio bakrimaniko on·ahani gimin songni manderangko aro dingtang dingtang dolrangko mittelpilangaha.
Ia gital jang·keko tarianiara, songni manderangnasan ong·aigija Wari Chora-ni nitoaniko nina re·baenggipa manderang pilaknan namgni ong·gen ineba member-rang aganaha.
Na·simang iakoba nina man·gen:
Na·simang iakoba poraina man·gen: Lakhimpur-ni Rupamoni Gorh Assamese me∙chikrangoni Everest-o gadochenggipa ong∙a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
