Tura, July26: West Garo Hills a·jani Tikrikkila, Dalu, aro Dadenggre Block-rangoni dol-chikkung Integrated Village Cooperative Societiy-rang (IVCS), a·dokoniko 19.725 metric tonne namgipa rokomni gulmoris-rangko kror 1.24 damrangna a·palchina badingataha.
Bak ra·gipa IVCS-rangara: Pringprang IVCS, Migasal IVCS, Chichang IVCS, Jangrapara IVCS, Rengsinpara IVCS, Chengaldare IVCS, Chandisila IVCS, Thallang IVCS, Bugi IVCS aro Kumonggrik IVCS.
Ia chu·sokaniara game-cha·giparangni ge·e-game man·anirangko pale-sim·e cha·anio bang·bata damrangko man·ani cholko mesokaha. 2023 bilsio, gulmoris-ko kg-prako gong 450 damrangko man·aha, indiba 2025 bilsio kg-prako gong 631-ko man·e, 40% barianiko nikna man·aha. Nambata damrangko man·aniara Meghalaya-ni agri-valueni ning·ao dingtang dingtang cholrangko jakkale gulmoris-rangko nambate chimongani, baseani aro dal·dalgipa antidamrangona sokatani a·sel ong·aha.
Game cha·gipa sakprako kg-100mangni gita chimonge, ia gulmoris-rangko badingna watataniara sak-200na baten game cha·giparangna bang·bata man·anirangko on·e aro dam donggipa ge·a-gamaniko dakna didianiko on·e dakchakaniko on·aha.
Ia gulmoris-rangko Mumbai-o donggipa Everest Masala Company-ona, uamangni badinggipa Sundardas Rathansey Spices Private Limited, Mumbai-ni gita watatgen. Indake dakanichi Meghalaya-ni game cha·giparangko India-ni dal·dalgipa mosla tarigipa karkanarang baksa bakrimna ja·ku de·ani ong·a.
Bak ra·gipa IVCS-ni dilgiparang Meghalaya-ni skotong minister Conrad K Sangma-ko, aro unbaksana Department of Horticulture, Meghalaya Basin Management Agency, Cooperation Department, aro MCAB Bank-ko uamangni dontonggija dakchake chu·sokaniko ra·baanina mitelaha. West Garo Hills a·jani District Horticulture Officer, Thera Ch. Marak-ni jakchi ia gumoris-rangko Nangrime IVCS Ltd, Tikrikilla-oniko Mumbai-ona watataha.
“Sorkari-ni aro bakrimgimin dolrangni nangrime kam ka·anirangchi chingna nambata damrango palna-sim·na aro nambata antidamrangona sokatna dakchakaha. Ia chu·sokaniko nike chingni songrangoni bang·bata game cha·giparang gulmoris-rangko ge·na didiataniko man·gnok,” ine gulmoris-rangko watatani somoio IVCS-ni mande saksa aganaha.
Ia chu·sokaniara, game cha·gipa dolrangko bilakate, rata-tetani ja·mano dakgni kamrangko namdapate, aro biaptango aro a·palchini antidamrangona watatna dam donggipa ge·a-gamanirangko bang·batate pangkamgipa janggi tangani cholrangko dakna Meghalaya-ni apalgipa miksonganiko chu·sokatani bak ong·a.
Na·simang iakoba nina man·gen:
Na·simang iakoba poraina man·gen: 2027 bilsio National Games-ko sokachakani bidingo NE a·dokni dilgiparang baksa Shillong-o tom·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
