Tura, June 5: Plastic-ko jakkalanichi namgija balwako ong·atenganio, minggipin cholrangchi a·dok-chigana namgniko ra·baskaani ba “Solution to plastic pollution” ine pangchakaniko donenba, West Garo Hills a·jani CEB Tura baksa nangrime, Tura-ni Forest & Environment Social Forestry Division, Sombar salo Dalu-ni Sacred Heart Higher Secondary School-o World Environment Day-ko maniangaha aro ia salko manianio ua joloni Bengali Secondary school aro Govt. Higher Secondary school-rangba bakko ra·angaha.
Dingtang dingtang susaatanirang jekai, noksa salsusaani, slogan aro essay sesusaanirangkoba skulni chatro-chatrirangna ong·atjolaha, jeon chegiparangna kragipa boksisrangkoba on·angaha.
Salni programo, kamoni neng·take dongenggipa (IAS) Pa H B Marak baksana Forest-ni DFO, Pa R K. Marak aro gipin niksenggipa manderangni dongpaanio Civil Sub-Divison-ni SDO, MCS, Pa PR Sangma, mongsonggipa sokgipa ong·e bakko ra·angaha.
Ia salko manianganio, West Garo Hills-ni Forest Department, skul bi·sarangna pang lak 1.1 mangni gita bol chararangko suale on·angaha aro apsandake, skul compound ning·o jinma apsan bol chararangkoba ge·angjolaha.
