Shillong, Aug 12: Meghalaya a·doko pilak olakiram biaprangko kullipiltaiatna mikang-mikkang, Shillong All Faiths’ Forum (SAFF) baksa damsan tom·aniko Bristibar salo a·dokni Chief Secretary Pa MS Rao-chi dakdilangaha.
Tom·ao kobor ra·timgiparangna aganengon, a·dokoni pilak olakkiram biaprangko kullipiltaiani, biarang ka·atani bidingo niamrangko ja·rikatani gimin bon·kame chanchirimna aro aro tikarangko su·china sorkarini didianio All Faith Institution-ni chakpaaniko am·na gita ia tom·aniko ong·ataha ine Pa Rao u·iataha.
Janapna gita, COVID-19 sajinmani gnigipa changna sokbataiani ja·man mija May jaoni intal a·dokni pilak olakkiram biaprangko chipattokahachim. Indake ong·oba, obostarangni ka·sinsin namroroaganiko nigrike a·dok sorkari ia August 16 tarikonide pilak olakkiram biaprangkon kulliatpiltaina gita tik ka·angaha.
Chief Secretary-ni u·iatani gitade, bia ka·anirango aro olakkiram biaprango tika su·mangimin mangmangkosan bakko ra·na gita on·aide nambatgipa ong·gen ingipa agan-ku·pattianikoba on·anggen.
Tikako su·na jechakani bidingo aganengon, tikako ra·na man·gipa bilsi 18 batgipa pilak a·doko sondongenggiparangko matchote 100 percent gape tika su·angna gita sorkari nisanko donenga ine Pa Rao janapataha.
“Chingni mingsa u·isoaniara, tika su·ani gimin bang·a manderangona sokatna nangenga aro iana nama tiktako pilak olakkiram biaprangko kulliatpilanian nambatgipa ong·gen maina iako dakanichi tikarangko su·anio cholrangko oe on·na man·gen,” ineba Pa Rao agankuaha.
Chief Secretary-ni ning·joljol koborko man·ani gitade, 90% bang·batan tika su·na jechakgijagiprang ong·a, uni gimin uamangni olakkiram biaptangtango apsan ong·piltaina man·gen ingipa chanchianio ian pilak olakkiram biaprangko kulliatpilanichi manderango tikako matchote su·anio sorkarina dakchakaniba ong·gen.
Apsandake, olakkiram biaprangko kullipiltaiani gimin Shillong All Faiths’ Forum (SAFF)-ni toromni dilgiparangba namgipa agan-ku·pattianirangko on·angtokaha. Bang·bata Christian toromni dilgiparangan man·adipet gilja ka·aniko ong·atjringgen jedakode sakantian bakko ra·pana gita cholko man·gen ineba tik ka·angtokaha.
Indake ong·engon, mija bilsio gita apsandaken a·dok sorkari, asongchakgipa biap bakgittamoni baksanasan cholko on·aiaha. Pilak olakiram biapon saksa-sakgipinoni chel·tanggrikani, mikkango mask-rangko ganani aro jakrangko jaksujringaniko ja·rikanirang dongna gita nanggen.
