Shillong, Aug 1: Salgro salaram a·dokrangni gisepo meligrikgijaniko dolsanchide namatna man·jawa aro pilak political dolrangkon agan-chanchirimaniona ra·bana nanggen ine Robibar salo, a·dokni Opposition dolko dilgipa Mukul Sangma parakataha.
A·dok damgnini simarango meligrikgijanirangna BJP dolko matnangatengon, ia meligrikgijanirangko BJP dol namatna nangnikbebeenga ong·ode pilak political dolrang baksaba agangrikchengna nanggen ine Sangma aganaha.
Iandakgipa cholrangko ra·e BJP dol, election-rango susana miksongenga ineba Sangma matnangataha.
Congress dilgipani aganani gitade, a·dok damgnini gisepo ong·enggipa obostarangni gimin BJP dilgiparangni agangipa kattarangara manderangko ding·chaoatna dakgipa kattarangsa ong·enga aro iandakgipa kattarangko agananichide ia neng·nikanirangko namatchipna man·jawa.
