Shillong, Sept 14: A·dok gimikoni sanchakram biap ge 450 sub-centre-rang aro dispensary-rangko Public Health Centre (PHC)rangona ra·doatani bidingo chanchie ra·bagipani gimin Meghalaya sorkari nienga ine Mongolbar salo Assembly-o tom·ao warachakgipa dolni dilgipa Dr. Mukul Sangma-ni sing·doanganina dakchakgipa skotong minister aro Health and Family Welfare-ko jako ra·enggipa Pa Prestone Tynsong aganchakangaha.
Badita ge sub-centre-rang aro dispensary-rangko ra·doatani bidingo chanchie ra·baahachim ukoba Dr. Sangma ma·sina sike sing·angkuaha.
Ia pilak sub-centre-rang aro dispensary-rangko ra·doatani gimin kamrangko ka·na skangba ning·tue sandirokaniko dakna nanggen ineba Pa Tynsong aganangkuaha.
Unomiting, tom·ani a·bachengo Ranikor-ni UDP MLA, Pa Pius Marwein-ni sing·anggipana uni aganchakanganio, Mawpud Sub-Centre-ko PHC-ona ra·doatna miksongenggipako sorkari niengkua ineba dakchakgipa skotong minister u·iatangaha.
Sorkarini jensomoio iako chu·gimik niani ja·man, a·dokni sanchakram biaprangko PHC-ona ra·doatchina gita bilko on·anggen ineba Pa Tynsong ka·dongatani kattako aganangaha.
