Tura, Dec 05: A·jani manderangna sana-bananiko on·ani a·bako namdapatna gita miksonge, a·dokni Health Minister Pa James K Sangma, West Garo Hills a·jani ning·ogipa Jengjal Sub-Divisional Hospital-o Drone Station Hub-ko Sombar salo a·bachengate on·angaha.

India-ni salgro-salaram jolo skanggipa changna ra·bachengenggipa Drone Station Hub-ko a·jao a·bachengate on·anganio, a·dokni health minister Pa James Sangma jinmana aganprakatengon, ia biapko dingtangmancha a·bachengate on·anichi songadamrango sagipa-ding·giparangko sana-bananio tanggtik ong·e nanggipa kamrango bilongen dakchakbeani ong·gnok ine parakatan baksa, sana-bananio nanggipa bosturang jekai tikarang, samrang, porikka ka·ani sample-rang, an·chirang ba ugita dakgiparangko dakronga-ka·ronga somoi gita aro tanggitik ong·e watruraani kamrango km 50 mangni ning·ogipa health centre ge·sa ge·gipinona sokatna gita drone-ko jakkalanggen ineba Pa Sangma aganangaha.

Biap aro a·jani ga·nanggijaniko aro bang·a neng·nikanirangko u·ie, chasongni kri nanggipa bosturangchi dakchakaniko ra·na aro sana-banani bosturangko ta·rakbate sokatna man·na gita niksamsoani gnang a·dok sorkari ia project-ko a·bachengataha ineba Pa Sangma u·iataha.

Jengjal Hospital-oni chalainasienggipa Drone Station Hub, a·jani namen ning·tugipa songadam biaprango sana-banani cholrangko on·enggipa ge 25 biaprangna dakchakaniko on·anggen.