Nongpoh, Oct 09: COVID-19-chi su·pekako man·ani a·sel bilsi-gnina dontongatani ja·man, Adventurous Hynniewtrep Off Roaders (AHOR), ianpakde mija Sukrobar saloni 4-gipa changna AHOR 4×4 Off Road Challenges 2022-ko Ri-Bhoi district-ni Kharsati Park Umtham-o ong·atangtaipilaha.
Biap ga·nanggija ramao chakka sambrigipako a·doko brigipa changna salsusaatgipao manderang bang·en bakko ra·angtokaha, indake sak 27 mangni gita Stock Category-o bak ra·aha aro sak 9 gipinrang Modified Category-o bakko ra·e susaangtokaniko nikna man·aha.
AHOR-ni president Damian Umdor-ni AHOR-ni miksonganiko talate on·angengon, off road sports ba ga·nanggija ramao jekon agangenchimode ramani a·palchi gari salsusaataniko Meghalaya-o tang·doatna miksongan baksa, iandakgipa biaprango gari-gorarangko sale rona namnikgipa manderangna pangchakani biaprangko on·na gitaba ong·jolaha ine aganangaha.
“AHOR-ni da·o ong·atgipa Off-road Challenges-ara chang 4-gipa ong·a jekon 2020 aro 2021 bilsirango sajinmani giproroanichi ong·atna cholko man·jahachim, indiba iandakgipa off-road gari salsusaaniko bilsiantin ong·atna gita AHOR kang·kare kaenga”, ineba Damian Umdor agandapataha.
Indake ong·engon, ia susaaniko mija Sukrobar saloni a·bachengate October 8 tarik, Sonibar salo ong·atchotenba nambee matchotataha.
