Shillong, Jan 13: Ia jani gisepon Union Home Minister Amit Shah-ko Shillong-ona re•bana sienga aro uno Meghalaya a•dokni Chief Minister Conrad K Sangma, Inner Line Permit (ILP) aro Meghalaya Residents Safety & Security (Amendment) Bill-ni bidingo agangrikanggen ine u•iataha.
“Anga Home Minister Amit Shah baksa agangrikaha aro ua re•baenggipa January 23 tariko NEC plenary meeting-ona re•baani ong•engachim. Ua re•babebegenchimode anga uko Shillong-on gronggen indiba uni program-o maiba dingtanganirang donggenchimode anga ia January 23 tarikna skangan Delhi-ona re•anggen,” ine Chief Minister parakataha.
Koborko on•ani gitade, re•baenggipa January-ni 23 tariko North Eastern Council (NEC)-ni chang 69-gipa plenary session-ko Union Home Minister Amit Shah, dilani ong•engachim.
Re•anggipa December jaoba Meghalaya a•dokni Governor Satya Pal Malik, Union Home Minister Amit Shah-ko New Delhi-o gronge, MRSSA baksana a•dokni nangenggipa dingtang dingtang kamrangni bidingo agangrikangahachim. Indake ong•genchimoba, Union Home Minister Amit Shah, Meghalaya a•dokni Chief Minister Conrad Sangma-ko gronge agangrikani ja•manosa Governor baksa agangrikgipa kamrangni giminde name tik ka•angna man•gen ine u•iatskaahachim.
