Shillong, Oct 7: Army Service Corps-ni chang 11-gipa Reunion aro chang 262-gipa Corps Day-ko maniani bak gita motorcycle-rangko sale re•jomenggipa ‘Tornadoes’ dol, Sukrobar salo, Meghalaya a•dokni skotong Shillong songjinmaona sokbaaha.
A•songna dangdike on•anio janggitangtangko gimaatna nanggipa Army Service Corps-ni sipairangko gisik ra•na aro mande ra•pilskaaniko dakna gita ia ‘Tornadoes’ dol, India a•songni salgro salaram a•dokrango kilometre 2500 ong•gipa ramako sal 22-na re•jomenga aro ia sipairang, re•anggipa October 1 tarik dipet motorcycle-rango Tezpur-oni re•chakatbae, Sukrobar salo Shillong songjinmaonaba sokbaaha.
Army Service Corps-ni motorcyle sale mesokgipa ‘Tornadoes’ dolko 1967 bilsio a•bachengatahachim aro ia sipai dolni aiao inmambegipa kamchi da•o dipet ming 32 World Record-rangko man•ahachim.
Km 2500 ong•gipa ramako motorcycle-rango re•jomaniko Major Ramya Venkat aro Captain AS Grewal dilenga aro ia dolo gimik sak 15 bike salgipa sipairang bakko ra•enga.
Ia sipairang, Shillong songjinmani War Memorial-o sianggimin sipairangna dingtangmancha mande ra•pilskaanirangko dakanggen aro October 9 tariko Shillong songjinmaoni re•ongkatanggen.
