Shillong, Oct 07: Jingjengatenggipa skigipa dolni mija Bristibar salo Shillong, Main Secretariat ning·achi napdrana am·tokani a·sel golmalrang dal·en ong·angani ja·man, a·dokni education minister Pa Lakhmen Rymbui, ia obosta ong·anina suk ong·chakjae skigiparangni bilsirang batahaoba uamangna ka·sachakani gita Meghalaya Teacher Eligibility Test (MTET) porikkako sepiltaina cholrangko on·gen ine jingjengatenggipa dolna Sukrobar salo ka·dongataniko on·angaha.
Golmal ong·gipa biapo tear gas-rangko jakkalani bidingo aganangengon, unsalo police aro jingjengatgipa dolgnini gisepo maiamancha ong·ahachim, sandiatanirangko dake uni report-ko on·china gita Home minister, district administration-ko ge·etataha.
“Section 144-ni niamko ra·gatata baksanaba ning·achi napdraangna gita uamangna bilrangkoba on·jachim, uni gimin pilak obostani gimin sandiataniko dake uni report-ko on·china aganaha aro report-rango pangchakesa jekoba dakna man·gen,” ineba Pa Rymbui janapataha.
Ia pilak obostarang ong·genchimoba, contract-o skie on·enggipa jingjengatgipa dol secretariat office mikkangon janggi donga dipetna jingjengatangkuna gita tik ka·angtokskaaha.
