Itanagar, Dec 27: Arunachal Pradesh Public Service Commission (APPSC)-ni question paper leak ong·atgipani bidingo CBI-chi sandirokchina dabienganiko chu·sokatkujaengani gimin Mongolbar pring 5:00 bajioni attam 5:00 bajiona All Nyishi Students Union (ANSU) dolni gita konta 12-na Arunachal Pradesh a·dokni skotong Itanagar songjinmao bandh-ko ong·atangaha.
Ia bilsini August 26 aro 27 tarikrango assistant engineer (civil)-ni kamna porikkako seatanio APPSC-ni question paper leak ong·ahachim aro iani bidingo porikkako segipa candidate-rangoni saksa Gyamar Padang, police-rangna seachi badi ka·doangahachim.
Iandake question paper-ko leak ong·atgipani bidingo CBI-chi sandirokatchina gita ANSU dabiengoba, union-ni dabianiko Arunachal sorkari chu·sokatkujaengani gimin Mongolbar salo konta 12-na bandh-ko ong·ate jingjengatna a·bachengatskaaha.
Konta 12-na ong·atenggipa bandh-ko ra·galpilchina Arunachal Pradesh-ni home minister Bamang Felix, ANSU-ko mol·molatahachim indiba uni mol·molaniko knachakgija ANSU, bandh-ko ong·atangskaahani a·sel Itanagar songjinmao Mongolbar salgimikan manderangni re·ruraanirangko nikna gita man·jaha.
Iandake question paper-ko leak ong·atani gimin Arunachal-ni police-rang, re·anggipa December 5 tarikon, APPSC-ni deputy secretary-cum-controller of examination Taket Jerang, AE porikkako segipa candidate Thomas Gaduk, Jeju Institute-ni skigipa Akhilesh Yadav, head assistant aro Thomas Gaduk-ni pagipa Tanyang Gaduk, GPS Tarak Pangin, junior teacher Tama Saroh aro courier-ko chalaigipa Dilip Saha baksana gipin sakgittam manderangko rim·skaahachim.
