Guwahati, Jan 9: Scientist-rang India-ni Arunachal Pradesh a·dokoniko badiaba badiaba biaprangoniko gitalgipa rokom gni beng·blokrangko man·aha, uarangara – Soman’s Slender Arm Frog (Leptobrachium somani) aro Mechuka Slender Arm Frog (Leptobrachium mechuka) ong·a.
Iarangoniko rokomsako sianggimin journalist E. Somanath-ni ong·telaigipa samtangtangrangna janggi tanga gimik dangdike on·aniko gisik ra·na mande ra·e uni bimungchi mingaha.
Ia am·sandianio Brahmaputra chibimaan janggi gnanggiparangni dingtang dingtang rokomrangko biapni kri ma·ekatgipa ong·a ine nikna man·aha. Sandie man·gimin rokom gni beng·blokkrangko chibimani Salgrochipak nikna man·a, aro una skang man·gimin Leptobrachium genus-ni beng·blokrangko Salgipengchipak nikna man·a.
Ia am·sandianirangko bilsi gittamna baten Arunachal Pradesh-ni a·bri-a·kongrangona re·jojoe kam ka·ani ja·mano man·aha aro US-ni scientific journal PeerJ-o chapa ka·ataha.
Arunachal Pradesh-ara Himalaya-ni rokomari bol-wa·arang aro do·o-matrang bang·gipa biapni ning·o ong·a, aro iano chio aro a·gao donggipa jonturangba bang·beanina mingsinga.
Iarango man·giparangoni beng·blok rokomsa Megophyridae minggipa ong·a, jean a·gilsako bang·bate nikna man·gipa beng·blokrangoni rokosa ong·a. Iandakgipa jakpong ram·srokgipa beng·blokrangko (Leptobrachium) Asia-ni Salgipeng aro Salgipeng Salaram jolrango rokom 40-rang nikna man·a.
Ia gital man·gimin beng·blokni rokomko S. D. Biju aro unbaksa am·sandigiparang, uni chatro Skalabya-ni PhD research dake poraianio sandie man·aha. India-ni Salgro Salaram-ni a·dok dambongao re·roroe am·sandianirangko dakengon, uamang jakpong ram·srokgipa beng·blokrangko adita rokomrang nikna man·aha.
Uni ja·mano Arunachal Pradesh-oniko laboratory-ona ra·bae uarangko nie nion, rokomgnide science-ni am·sandianio gitalgipa ong·a ine u·ina man·aha.
Dingtang dingtang bewalrangko jakkalenba uamang ia am·sandianirangko daka jekai taxonomy, DNA sequencing, dal·gimin beng·blokrang aro alaringrangko tosusaani, bioacoustic analyses, aro grengrangko three-dimensional micro-CT scan-rangko dake nianirang.
Gital man·gimin rokomrangni molecular data-ko apsan genus-ni gipin rokomrangni data baksa tosusae niaha.
“Gital man·gimin rokom gni beng·blokrangni bidingo uamangni dingtang ong·aniko u·ina chinga bang·a sakkirangko man·aha. Chingni am·sandianirango, chibimarangchi ma·ekataniko man·e, mongsongbate iano Brahmaputra-ni ma·ekatanichi ia jakpong ram·srokgipa beng·blokrangni rokomrangko dingtang dingtang biaprango nikna man·a,” ine Prof. Biju talatangaha.
Beng·blok rokomrangko talatani
Soman’s Slender Arm Frog (Leptobrachium somani)
Ia beng·blokni rokomko Arunachal Pradesh-ni Tiwarigaon-oniko man·aha aro uni ro·a 55 mm-mang ong·a. Uni be·enno rong kaltappru aro a·mang rong brina, uno tapprani rong chikmangijachi salsitarang donga aro uni mikronni rong rupa aro tapprani rong ba tangsim chikmangija ong·a. Ia beng·blok tangsekkamgipa burungrango donga (evergreen forest), biparangko chiring rikamrango nikronga. Ia beng·blokni rokomko journalist E. Somanath sagini bimungchi mingaha, jean beng·blokrangko sandina Prof. Biju baksa re·parongachim.
Mechuka Slender Arm Frog (Leptobrachium mechuka)
Ia beng·blok 60 mm-mang dal·a aro ua tangsekkamgipa burungrang aro uni sepango donggipa samsiarigipa biaprango donga, Uni be·en a·mang rong dake gitchakmrang daka donga aro uni mikronni rong rupa aro gipok rong brina. Ia beng·blokko Arunachal Pradesh-ni Mechuka songjinmani bimungchi mingaha, jeonikon uko nikchengaha. Iana skangba ia beng·blokko China-oniko man·ahachim indiba uko dingtang rokomni ine ma·sisretaha.
Na·simang iakoba nina man·gen:
Na·simang iakoba poraina man·gen: Assam-o doctor ine dakmikgipako Dhubri Police rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
