Guwahati, Aug 13: Dingtang dingtang dolrangni jegalenggipa Assam Cattle Preservation Bill 2021-ko Sukrobar salo Assam Assembly pass ka·angaha aro ia Bill-ko pass ka·ahani gimin opposition dolrang, suk ong·gijaniko mesokna gita Assembly-oni ong·katgrimskaaha.
Ia Bill-ko Assembly-o pass ka·china gita ra·angani somoio Assam-ni Chief Minister Himanta Biswa Sarma, jinmana aganprakatengon, matchu den·aniko champengatanichi ia Bill, dingtang dingtang jatrangni gisepo meli-nangrimaniko ra·bagen ine parakataha.
Ia Bill, jekon da·o Assam-ni Governor soi ka·na nangkuengachim, Assam a·doko BJP sorkariko riktaiani ja·man Assembly-ni skanggipa salo, Assam-ni Governor Jagdish Mukhi-an uni rimchaksoani kattarangko agananio ia Bill-ni gimin janapchengahachim.
Ia Bill-ko Assam Assembly-ni opposition dolrang jegalskaenba, komibeoba ming 75 point-rangko taridapchina aro Select Committee-na pakwatatchina dabiangskaahachim.
Ia Cattle Preservation Bill-ara, Assam a·doko matchu den·aniko, cha·aniko aro salruraaniko champengatan baksana maming permit gri Assam a·dok gita matchu salangna, Hindu, Jain, Sikh aro matchu be·en cha·gijagipa biaprango matchu be·en palaniko champengna aro mite nokrangoni ba Hindu-rangni olakkiram nokrangoni sambarango matchu be·en ba matchuni bostu palaniko champengna ra·gatenggipa niamrang ong·engachim aro ia niamrangko pe·genchimode ia gital niamo pangchake komibeoba bilsi 8-ona kingking pattoko donako man·genchim.
