Guwahati, Jan 11: Assam Don Bosco University (ADBU) Assam aro Salgro Salaram-o tarichenggipa skanggipa satellite LACHIT-1-ko ISRO-ni PSLV-C62-o gate January 12 tariko watatnasienga aro ian Salgro Salaramo iandakgipa chu·sokaniko man·e itihas-o namen gamchatgipa aro gisik ra·na kragipa ong·anggen.
Ia satellite-ko Live Amateur Communication Hub for Innovative Technologies -One (LACHIT-1) ine mingaha, aro unko Hyderabad-ni Dhruva Space-ni Polar Access (PA-1) programme-o gate watatgen, ian salgisakona satellite aro uandakgiparani bidingo kam ka·ani dal·roroanio India-ni Salgro Salaram-ni bakrimaniko dakani ong·enga.
LACHIT-1-ara chatro-chatrirangni a·bachengatdilatgipa ong·a aro iano Salgro Salaram-ni dingtang dingtang biaprang jekai Assam, Meghalaya, Nagaland, Arunachal Pradesh, aro Manipur-oni sak 50-na baten chatro-chatrirang aro skigiparang bak ra·aha. Ia mission-o a·bachengaoni matchotaona kingking dingtang dingtang bakrang jekai satellite design, integration, testing aro mission operation-rango bak ra·giparangni krenge kam ka·anirangko mesoka.
Ia satellite-ko itihas-o mingsinggipa Ahom general Lachit Borphukan-ni bimungchi mingaha, aro ian a·dokni su·ugipa itihas aro chasong gitalo technology-ko jakkale kam ka·anirangko donbrine kam ka·aniko mesoka.
LACHIT-1-ko Dhruva Space-ni ASTRA-ni (Accelerated Space Technology Readiness & Access) Academia programme-na tariaha, aro uko company-ni P-Dot flight-qualified satellite platform-o rikaha. Dhruva Space-ni dakchakanichi ADBU team ia mission-na chu·gimik kam ka·anirangko dakangaha.
Ia satellite-ko Dhruva Space-ni DSOD-1U separation system-ko jakkale orbit-ona watatgen.
Orbit-ona sokahaon, Dhruva Spave-ni Integrated Space Operations Comand Suite-ni (ISOCS) dakchakanichi VHF/UHF ground station-ko jakkale LACHIT-1-ko ADBU-oni chalaigen. Satellite-ko watna tarisamsoengon, chatro-chatrirang aro skigiparang uamangni pilak kam ka·anichirangko nipiltaitaie namedake chalaina man·na gita gong·rake aro gisik nange pilak dakna nangarangko dakaha.
Radio-ko jakkale store-and-forward satellite communication system-ko dakna man·na gita LACHIT-1-ko tariaha. Ia system a·gilsakoni watatenggiparangko satellite-o done ja·mangipa orbital pass-rangni somoio a·gilsakona watatpilna dakchaka.
Iandakgipa kamrang nangchongmotgipa aro a·sel ong·gitikani somoirango, mongsongbate Salgro Salaram-o ong·ronggipa obostarang jekai chi banna aro a·a be·ruruna altugipa ba network donggijagipa biaprango mikkangchi jakkalna man·gen ine u·ina man·a.
Assam Don Bosco University-ni Vice-Chancellor Jose Palely ia mission-ara dal·gipa chu·sokani ong·a ine parakataha.
LACHIT-1-ara India-ni space ecosystem-o namedake on·gilna Salgro Salaram-ni krenganiko mesoka baksana mikkangchini scientist-rang aro engineer-rangko tarisona skie ra·chakram biaprango skie on·ani baksana dake nianiko dakbrinnani cholko mesoka.
Chasong gitalo space ba bang·bango kam ka·anirangara badiaba badiaba biaprangosan dakna man·aia ine ong·aija ine ia mission-chi mesoka ine Dhruva Space-ni Director (Sales and Business Development)Avinash Maramraju aganangaha.
Polar Access-1 aro ASTRA for Academia gita dakgiparang satellite-ko campus-oni orbit-ona ra·angna ADBU-ko dakchakaha ine ua aganangaha.
ADBU uni Space Programme-ko 2022 bilsio a·bachengataha aro ua somoionin satellite engineering, mission operation-rang aro ground station management-rango kamrangko apalbatataha, ine ADBU-ni Research and Development-ni Director aro LACHIT-1 project-ni Mission Director Vikramjit Kakati aganangaha.
Ia programme space technology-ko a·doko namdapatrorona kam ka·a baksana, chatro-chatrirangna skie on·ani baksana dake niani cholrangko on·na university-ni miksonganirangko parakata ine ua aganangaha.
LACHIT-1-ko chalaianio ja·mano, uko a·gilsak gimikni radio knagiparang jakkalna man·gen aro a·gilsak gimikni license gnanggipa operator-rang satellite communication-o dake nianirango bak ra·na man·gen. Dhruva Space, National Institute of Amateur Rasio and ADBU baksa bakrime a·sel ong·anirangni somoio koborrangko on·na chonchongipa satellite-rangko jakkalna training programme-rangkoba ong·atanggen.
Ia project-o bak ra·gipa sak 50 chatro-chatrirangna namen rasong chaa aro ia satellite-ko mingsinggipa Lachit Barphukan-ni bimungchi mingahanina namen kusi ong·aha ine Assam-ni Skotong Minister parakataha.
Na·simang iakoba nina man·gen:
Na·simang iakoba poraina man·gen: Pension-ko on·anina gitcham MDC Mahamsing, CM-ko mittelpila
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
