Shillong, Aug 4: Assam aro Meghalaya a•dokni simarango meligrikgijaniko namatna gita a•dok damgnini chief minister-rang August-ni 6 tariko agangriktaina siengani gimin Assam-na maikoba on•e maikoba man•pilskana miksongede agangrikjachina gita Congress dolni MLA PT Sawkmie, Meghalaya sorkariko didiangaha.
“Koborni gitade Assam a•doksa Meghalaya-o napdraenga indiba an•chingni manderangde indake dakjaenga. Uni gimin ‘on•a-ra•a’ dakgipa bewalo agangrikanichide an•chingsa noksan ong•batnagipa ong•enga aro bang•bata a•arangkon Assam-sa man•anggnok,” ine Budbar salo Congress MLA PT Sawkmie parakataha.
Ru•utbea bilsirangonin a•dok damgnini gisepo meligrikgijaniko nikna man•engani gimin a•dok damgnini gisepo namgrikpilna gita da•o agangrikengoba bakande ia neng•nikaniko namatna man•kujawa ineba Sawkmie talataniko on•angaha.
“Ia neng•nikaniko Meghalaya a•dokni bilsi 50 gapaniko manina skangan namatna man•gen ine manderangni ka•dongsoanide chu•sokna man•jawa maina ian namen salsani gisepo namatna man•gipa kam ong•jawa,” ine Congress MLA aganaha.
See rakkigimin lekkarango pangchakesa a•dok damgnini gisepo agangrikchina gitaba ua didiangaha.
