Shillong, Aug 4: Jabri batangpilani ja•man Budbar salo, Jowai-o jabolrangko Jowai Municipal Board (JMB) galpiltaina man•aha.
Jowai Amlarem Dawki ramao donggipa Mynjakai-o jabol galaniko song damsnini dorbar-rang jegaltokahani gimin JMB, jabol galaniko dontongchengna nangahachim aro untalan JMB, JHADC baksa jabol galchakani gital biapko sandiengahachim.
Gital biap sandianio JMB, chu•sokjahani a•sel Jowai-ni mongsonggipa biaprangosa jabolrangko chimongna a•bachengaha aro uandaken ja•mano ta•raken biapko sandie on•china gita Jaintia Hills-o dingtang dingtang dolrangni nangrime bikotgipa Joint Action Committee, sorkariko didiangskaaha.
Indake ong•engon, da•al salni bako Jowai-ni dingtang dingtang biaprangoniko JMB, jabolrangko chimongna a•bachengtaiaha ine West Jaintia Hills a•jani Deputy Commissioner Garod LSN Dykes parakataha.
