Guwahati, July 19: Assam a•doko board porikkani class 10 aro class 12-o poraienggipa chatro chatrirangoniko tangka paisa ra•enba mark bate on•gipa dolko police-rang rim•na man•aha.
Iani bidingo da•o dipet mande sakgniko police-rang, Kamrup a•jaoniko rim•aha aro gipin saksni manderangkoba sing•sandina gita rim•aha ine police-rang kobor on•aha.
Rim•ako man•gipa aro police-rangni sing•sandienggipa saksni manderangara sorkari skulrango skigiparang, skul inspector-rang aro state board-ni coordinator ong•achim aro ia manderang, ku•mitdu ra•enba, chatro chatrirangna mark-rangko bate on•engachim ine kobor on•aha.
Assam-oba gnigipa changna COVID giproroengani gimin class 10 aro class 12-ni porikkarangko dontongatenba, mark-rangko chatro chatrirangna batanggimin bilsirango man•ani kri aro skulrango uamangni man•ani kri on•skana tik ka•angahachim. Ia result-rangko ia July jani bon•angachibara parakna siengachim.
Indake ong•engon, Education department-o iandake ku•mitdurangko ra•e ong•gija kamrangko ka•engani gimin Assam a•dokni Chief Minister Himanta Biswa Sarma, Education official-rangna mikrakataniko on•angaha aro iani bidingo police-rangko rake kamko ka•china ge•etangaha ine parakataha.
