Shillong, July 19: Ri-Bhoi district-ni ning·ogipa Umden-o gital C&RD Block-ko kulie on·na gita nangchongmotengahani gimin Nongpoh-ni MLA Pa Mayralborn Syiem baksana joltangni MLA Pa Balajied Ranee-maang Sombar salo a·dokni skotong ministerko grongangaha.
Uko grongango, Congress dolni sakgni dilgipa Syiem aro Ranee-maang, Ri-Bhoi district-ni aro mongsongbate Nongpoh constituency-ni manderangni chagrongenggipa neng·nikanirangkoba skotong minister-na agan-talate on·angaha.
Pa Syiem-ni janapatani gita, Umling C&RD Block-ara Ri-Bhoi-o namen gitchambatgipa block ong·a baksana da·o namen dal·batgipa block-ba ong·enga.
Umling C&RD Block-ni ning·o gimik ge 226 songrang donga baksana mande jela gimikara hajal 81,000 mangni gita ong·enga aro ge 15,000 nokdangrangba gnangchim. Iarango pangchake, uamangni mol·molaniko niroke kam ka·atchina gita Nongpoh-ni MLA-rang skotong minister aro C&RD-ni minister Pa Hamlet Dohling-maangko mol·molangaha.
Da·odipet, gital block-ko kulie on·ani gimin uamang sorkarioniko maming ku·rachakataniko man·sokujaoba manderangni neng·nikanirangko nirokatna gita sokari uamangna ku·rachakatskaaha.
Minggipinara, Nongpoh-Umden-Sonapur ramako nangenggipani giminba Congress-ni MLA-rang sorkario janapangjolaha.
Iako batanggimin somoion Meghalaya Legislative Assembly-oba naataha aro iako Meghalaya Integrated Transport Project (MITP)ni gnigipa gadango World Bank-ni chamatgnigipa tangka-paisarangchi tarina gita chanchianiko ra·bamanahachim ine Pa Syiem parakataha.
Unbaksana, da·omiting Assam baksa sima-arini gimin pilak neng·nikanirangko namatna gita cholrangko sandina a·dok sorkarini jotton ka·engmitingo a·dok damsa-damgipinni sima-ari jolrango indakgipa rama-jal·angrangko bang·e taridapna nangchongmotengani giminba MLA-rang sorkario agan-janapangjolaha.
