Guwahati, June 26: Assam a·doko cha bijak ge·aniko samtangtango donggipa ong·telaigiparangna maming nangchakea grigipa aro mikkangchi pangkamaniko ra·bana dakchakaniko on·a miksonganio, Assam Agroforestry Development Board (AADB), Kaziranga National Park Authority, NEIST, ICCo aro cha bijak ge·gipa dolrang apsan nangrimenba, Kaziranga-o dingtangmancha tom·bimonganiko ong·atangaha.
Assam a·doko lakh 2 mangni gita chonchongipa cha bagan dake cha·giparang jemangan a·doko man·gipa cha bijakrangoni atagrikni gita cha bijakrangko on·engachim, indiba a·arang namgijani a·sel, bilsi karini dingtang ba·roroani baksana damrang basakoba tang·ona tang·doa dakanichi neng·nikanirangko man·enganiko olgrokatna dakchakaniko on·a miksonganio ia tom·bimonganiko ong·atangaha.
Janjatiya Gaurav Varsh-ni bak gita, Tribal-rangni matgrik Birsa Munda-ni atchiani bilsi 150 gapani salo una bibalrangko on·anichi ia tom·bimonganiko a·bachengataha.
Kaziranga Park aro AADB-ni CEO, Dr. Sonali Ghosh, jinmana aganprakaniko dakengon, groforestry ba cha bijak baksa jakkaltogipa sam bolrangko ge·na nangchongmotani gimin aganangaha, maina ian samtangtango donggipa ong·telaigiparangko naljoke rakkina, game ge·e cha·giparangni man·gnirangko namdapatna aro bilsi karini dingtangrorobaani gisepon gama ge·anirangko dakna dakchaka ineba ua janapataha. Uasan ong·aigija, ua game ge·e cha·gipa sakantian sam bolrang jekai, agarwood ba similgipa to-rangko tarina jakkalgipa bol pangrang, bite nanggipa bolrang baksana samna jakkalgipa sam-bolrangko ge·chinaba ua ku·pattaianirangko dakangaha.
Agarwood ba ” Tree Of the Gods” ingipa bol namen gamchatbegipa ong·ani gimin ian game ge·e cha·giparangna tangka paisarangko man·a dakchakgen. Assam a·doko kror 10 mangna baten agar bol pangrang dongani gimin ian a·gilsak gimiko agarwood-oniko tarigipa bosturang jekai similgipa to aro samrangko tarie palgipa biapo mongsonggipa bak ong·ata.
NEIST-ni Director, Dr. G. Narahari Sastri, agarwood bol pangrangna agre science aro bading chiwalani bidingo aganangskaaha. ICCo-ni Executive Director, Alay Barah, cha bagan sambarango mande aro buringni matburingrangni gisepo nanggrikanirangko komiatna agroforestry dakchakaniko on·a ineba ua janapataha.
All Assam Small Tea Growers’ Association-ni Rajen Bora aro North Eastern Tea Association-ni Manisha Sharma, an·tangtangni janggi tanganio dake nie u·ianirang baksana bang·bata game ge·e cha·giparangkon agroforestry-ko ra·gatchina ku·pattianirangko on·angaha.
Ia ja·ku de·aniko bimang ong·atna gita, chonchongipa cha bijak ge·gipa dolrangna agarwood bol bi·sarangko suale on·angaha.
Tom·anio jinmana aganprakaniko dakengon, Assam-ni Revenue aro Climate Change Minister, Keshav Mahanta, bilsi karini dingtangrorobaaniko warachakan baksana mande aro matburingrangni gisepo nanggrikanirangko komiatna a·arangko name jakkalani bidingo aganangaha. MP Kamakhya Prasad Tasa, chonchongipa cha bagan dakgipa dolrangna dakchakaniko on·an baksana agroforestry-ko ra·dona sorkari kamrangko ka·angkugen ineba janapataha.
Na·simang ia video-koba nina man·gen:
Na·simang iakoba poraina man·gen: A·doko damgni gital block officerangko oprake on·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
