Guwahati, Feb 19: Assam a·doko gimik changgnina kingking skotong minister on·anggipa gitcham Pa Prafulla Kumar Mahanta-ko knasoani gita mijal Bristibaro uni be·enni saarang nambatrorojani gimino Delhi-china rimdoange All India Institute of Medical Sciences (AIIMS) hostpitalo sana-bananiko dakatenga ine kobor man·soaha.
Koboroniko knasoani gitade, bilsirang re·angan baksa bilongbee saenggipa Pa Mahanta-ko AIIMS-o nambate sana-bananiko on·na gita sildorengo gate rimangaha.
“Pa Mahanta, jean adita salrangonin be·enni an·senggijaniko man·engachim uko nambate sanna gita AIIMS-china ra·jitangaha aro ua da·ode name dongenga ine Asom Gana Parishad (AGP)oni saksa koborna u·iataha.
Batanggimin 1985 bilsio Assam a·doko skanggipa changna skotong minister ong·anggipa Pa Mahanta, adita salranagonin saaniko man·eming a·doktangni hospitalon sana-bananiko ra·engachim aro aganani gitade bilsirang re·angan baksa dingtang dingtang be·enni sabisirangba uo dongchapaha.
Ka·tong saako agananio Pa Mahanta-ko mija January 16 tariko Guwahati songjinmani ge·sa private hospital-o done sanangaha, indake uko Intensive Care Unit (ICU)-o donatani ja·man ua on·tisade namkalahachim.
Bilsi 68-ong·gipa Pa Mahanta-ra Assam-ni bijangchiogipa Nagaon district-ni Barhampur Assembly constituency-oni Asom Gana Parishad (AGP) dolni saksa MLA-ba ong·a.
