Tura, Feb 1: Assam, Goalpara Distrct-ni Bapujinagar minggipa songoni saksa bilsi 23 ong·gipa A·chik me·tra, mija jao ong·atgipa 6-gipa Open National Taekwondo Championship 2021-o susaange sona ba gold-ni medalko man·baaha.
Susaanio bakko ra·e songtang-noktangna aro a·doktang-chigatangna mikkim-rasongko ra·bagipa bilsi 23 ong·gipa Tra Roseline D. Sangma-ra Pa Jaganath D. Sangma aro Ma Urmila Sangma-ni demechik ong·achim.
Ua, re·anggipa January 22 tariko Himachal Pradesh-ni Manali songo ong·atanggipa chang 6-gipa Open National Taekwondo Championship 2021-o susae cheeming gold medal-ko man·baaha.
Iani bidingo kobor ra·timgiparangna uni aganani gita, ua da·o Goalpara College-o BA-ko poraienga aro iano ua darangni dakchakanikoba man·ja indiba uni ma·gipa-pagipani dakchakanichisa ia susaanio bakko ra·na re·ange chebana gita man·aha.
Kobor ra·timgiparangni uni mikkangchina chanchisoani gimin sing·on, ua an·tangni poraianiko skanggipa matchotatchengna miksongenga, uni ja·mano indakgipa apsan susaanirango bakko ra·angtaigen ine ua aganchakaha.
