Shillong, Aug 9: Meghalaya a•doko olakkiram nokrangkoba re•baenggipa August 16 tarik dipet kulipiltaiatna gita Sombar salo a•dok sorkari tik ka•angaha.
Sombar salo a•dokni Chief Minister Conrad K Sangma-ni dilanichi tom•e chanchirimangenba, a•doko olakkiram nokrangkoba kulipiltaina tik ka•e donangaha.
Iani bidingo kobor ra•timgiparangna talataniko on•angengon, torom nokrangko aro olakkiram nokrangko re•baenggipa August 16 tarik dipet kulipiltaina on•gnok ine a•dokni Deputy Chief Minister aro Health Minister Prestone Tynsong parakataha.
Dingtang dingtang district administration-rangoniko kobor ra•chengani ja•man aro dingtang dingtang dolrangni mol•molanirangko man•soani ja•man olakkiram nokrangkoba kulipiltaina sorkari tik ka•angaha ine Tynsong parakataha.
Olakkiram nokrangko kulipiltaina on•engoba manderangni tom•anio bakgittamoni baksana batna man•jawa ineba Deputy Chief Minister parakataha.
August 16 tarik dipetde olakkiram nokrango biarangkoba ka•na on•gnok ineba Tynsong parakataha.
“Iani bidingo niamrangko da•o salsa salgnini gisepo a•dokni chief secretary jinmana u•iatgen,” ine Tynsong parakatenba, olakkiram nokrangoba biako ka•na on•genchimoba, jinmako biaona sokachakna gitade on•skakujawa ine talatangaha.
