Guwahati, Aug 9: Assam a·doko gital ong·katgipa Bodo bobil dol, National Liberation Front of Bodoland (NLFB)ni gimik sak 32 bobil dakgiparang mija Robibar salo Indo-Bhutan sima-ari jol samba saliram Assam, Kokrajhar district-ni Jharbari biap jolo silchidarerang baksa an·tangtangko bame on·angtokaha.
Gimik sak 23 NLFB bobil dakgiparang dolni self-style platoon commander B Harfer-ni dilanichi mija Robibar pringo Indo-Bhutan sima jolo donggipa namen diltubegipa buringchini ong·katbatokaha. Indake, bobil dolni manderangko chi bottol aro pul bibalrangchi ua biapo rimchaksona gita dingtang dingtang songrangni bang·a manderang tom·dakaha. Unbaksana, NLFB bobil doloni jemangan iana skang an·tangtangko sorkarina bame on·sotokahachim, uamangoni mitamrangba uno dongpae uamangni janggi tangbewalona pil·batokaniko rimchaksoaha.
Iana skang, mija July 22 tariko NLFB bobil doloni komibeoba sak 23 sipairang, dolni skotong dilgipa M Batha baksa an·tangtangko bame on·angtokahachim.
Janapjolna gita, re·anggipa bilsi January jao ma·mong sorkari aro National Democratic Front of Bodoland (NDFB) bobil dolni gisepo gitalgipa Bodoland Accord-na songgigrikaniko dake soi ka·grikangani ja·man M Batha-ko dolni dilgipana seoke gital NLFB bobil dolko a·jao bikottaiahachim.
