Baghmara,Jan 29: South Garo Hills a•jani skotong songjinma Baghmara jolo ringani china neng•nikaniko man•enga ine koborrangko man•soaha. Baghmara jolo songdongenggipa manderangni kobor on•atani gitade, Rongdong chiringoniko PHE Department-ni pipe line salbae Baghmara-o chimongenggipa chi rongdikni pipe line-rang gita chi joka tik ong•gijanirang antigittam batpilengaha ine u•iataha. Ia neng•nikaniko department-ni manderang ta•rake nirok sandianiko dake chirangko tik ong•e watpachina jolni manderang PHE Department-ko mol•molataha.

Ringani chi mandena nangchongmotgipa ong•a aro chi gri mande janggi tangna amja.

Uni gimin Baghmara chi rongdiko chimonggimin chirangko maini a•selo wata tik ong•jaenga ine jolni manderang sing•doaniko dakangaha. PHE Department-oni maming u•iata gri antigittam batpile chi wata tik ong•jaengani a•selo songdongenggipa manderang namen neng•nikaniko man•enga ineba u•iatangan baksa jolni manderang ia neng•nikanirangko ta•rakale nirokatpachina department-ko mol•moljolangaha.