Tura,Jan 15: Ru•uta bilsirangoni galchipe donenggipa Baghmara, Ranikor sorok gitchambatgipa sorokrangoni dilsa ong•a, ua highway sorokko gital dake tarienggipa kamrangko nina gita Rongara-Siju MLA, Pa Rakkam A.Sangma Bristibar salo re•angaha. Ua kam ka•anirangko nike namen kusi ong•aha.
Ua sorok South Garo Hills-ni skotong Baghmara-oni a•bachenge, Panda, Kanai, Maheshkola gita Ranikor-ona dakanggipa sorok ong•achim. Ua sorokko tarianirang namen ta•rakenga aro namroroenga ine Pa Sangma nikna man•aha.
Ua sorok Ministry of Road Transport and Highways-ni ning•o SARDP-NE-ni gita Government of India (GoI) NHIDCL-chi a•bachengataha.
Ua sorokko taria ta•rake matchotna ka•dongenga.Jensalo ua sorokko taria matchotahaon jolo songdongenggipa manderangni janggi tanganirang tang•dobatgen,bading chiwalanirang, tourist-rang aro bang•a dingtangdingtang kamrangna re•a doanirango namen altubatgipa aro bakkandikgipa sorok ong•gen.
Ua sorokko ta•rakatna kam ka•atenggipa Meghalaya a•dokni Chief Minister, PWD Minister, PWD Officer-rang aro NHIDCL-ko Rakkam Sangma demitele aganangaha.
Maina ru•uta bilsirangoni jolo songdongenggipa manderang sorok namjani gimin, namgipa sorokko man•na gita senge dongengachim, da•alo ua sorokko ta•raken tariengaha.
“Anga ka•donga ia sorokko taria ta•raken matchotgen aro kam ka•anirang namen ta•rakenga,uni gimin jolo songdongenggipa manderang sakantian sorkari baksa bakrimpachina” ua didiangaha.
