New Delhi, May 26: COVID man•gipa mande jensalo gusua, atchinga ba ku•aganna, unon uni ku•sik ba gingtingoni ong•katangenggipa bisemrang balwa gita mandeskaona batrikrikna man•a ine COVID-19-na Union Health Ministry-ni gital clinical management protocol ba niamrangko tarianio parakaha. Re•anggipa 2020 bilsini June jao Union Health Ministry-ni tarigipa clinical management protocol ba niamrangode, COVID man•gipa mandeni sepango ong•on, uni gusuaoni, atchingaoni ba ku•aganaoni ong•katenggipa bisemrangchi mandeskao batrikrikna man•a ine parakahachim.
Adita salrangna skang, sorkarini principal scientific adviser office-oni on•atgimin niamo parakani gitade, sabisini man•gipa mandeoni ong•katenggipa bisemrangara metre 10-ona kingking balwa baksa re•chapna man•a.
“Ia sakkirangara, manderang metre 1-ni gisepo sepanggrike chadenggenchimode jo•ongrang mandeo batrikrikna man•a ine mesokani ong•enga. Sabisi man•gipa mandeni ku•sikoni jokangenggipa bisemrangko rang•sit man•ode ba mikron, gingting aro ku•sikrango nangatgenchimode ua mandeoba jo•ongrang napna man•a. Balwa donggijagipa kuturirango ba mande bang•gipa nokrang, jeon manderang ru•uta somoirangna mandeska baksa re•ata, uandakgipa kuturirangoba jo•ongrang mandeo napna man•a. Sabisi man•gipa mandeni ku•sik ba gingtingoni jokangenggipa bisemrang balwao dongkuengani gimin ba metre 1 baten balwa baksa re•chapengani gimin jo•ongrang mandeo napna man•a,” ine ma•mong sorkarini gital niamo parakataha.
