Itanagar, May 8: Bilsi kolgrik ong∙nasipilani ja∙mano, Royal Bengal Tiger-ko Arunachal Pradesh-o Pasighat-ni sepango donggipa D Ering Memorial Wildlife Sanctuary-o (DEMWS) jachipchango man∙aha.
Ia jachipchangko Ashoka Trust Research in Ecology and Environment-ni (ATREE) dakchakanichi Wildlife Sanctuary-o camera trap survey-rangko ka∙enba jachipchangrangko ra∙aha.
Official-rangni parakatani gitade, iana skang 2005 bilsiosa DEMWS-ni ning∙ao matchako nikchotaha, aro 2007-08 bilsirangoba nikanirang donga ine janapa indiba mamung sakki dongja.
2014 bilsio World Wide Fund for Nature-o chapa ka∙gimin survey-o matcharangko nikanirang komiaha inenba niam gri sikar ka∙giparangni a∙sel uarang gimaangaha ine janapaha.
Uandake, January 2026-o Assam-Arunachal Pradesh-ni sima ari jolo Kobu Chapori minggipa burungo dal∙gimin Royal Bengal Tiger-ni ja∙gamrangko nikanirangko Assam-ni Jonai forest range-ni forester-rang janapaha.
Ian namen katchaani katta ong∙a ine Divisional Forest Officer Kempi Ete aganangaha. “Bilsi kolgrikrang ong∙nasipilani ja∙mano matchani re∙bapilaniara samtangtangni bilakaniko aro burung-bolgrimrangko ripingna krenge kam ka∙anirangko mesoka,” ine ua aganenba, forest department-o kam ka∙giparang, Eco-Development Committee-rang aro songni-nokni dingtang dingtang dolrangko gisik nange ja∙ku deanina mitele aganangaha.
Adita somoirangna skang gimanasienggipa Chinese Pangolin ba Kawatte aro nikronggijagipa rokomsa sapau ba Hisipid Hare-ni bidingoba survey ka∙enba Arunachal Pradesh-o DEMWS-ni dingtangmanchagipa janggi gnanggiparangko ripinggipa biap ong∙aniko mesokaha.
Re∙anggipa bilsini gisepo matcha roramani chinrangko nikaha ine forest official-rang aganaha. Iana skang sandianirangko dakgenchimoba uamang jachipchangrangko man∙jaha indiba uamang dontonggija sandianirangko dake ja∙mano matchako jachipchang ra∙na man∙aha.
“Ian chingna namgipa kobor ong∙a. Royal Bengal Tiger-ni re∙bapilanichi ia wildlife sanctuary-ona re∙bana bang∙a tourist-rangna didianiko on∙gen. Chinga ia koborna namen kusi ong∙a,” ine saksa environmentalist aganangaha.
D Ering Memorial Wildlife Sanctuary, Arunachal Pradesh-ni East Siang a∙jani Pasighat-oni km 13 chel∙ao donggipa 190 sq km ong∙gipa ripinge donenggipa burung ong∙a. Uko 1978 bilsio a∙bachengataha aro uni wilwilao Siang aro Sibya chibimarang donga, aro ua bang∙a matcharang, matchapengrang, burungni matmarang aro bilsianti bilbagipa do∙orangni dongchakram ong∙a.
Na·simang iakoba nina man·gen:
Na·simang iakoba poraina man·gen: Garo Hills-o so•sojengjeng ong•aniko ning•tue sandina Inquiry Commission-ko songa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
