Shillong, Jun 6: Meghalaya a•doko buring bolgrimrangko ripingna aro jillarangko rongtal an•tale rakkina gita sorkari, dingtang dingtang kamrangko a•bachengataha ine Sukrobar salo, Mawdiangdiang-ni New Assembly Complex-o bol ge•ani program-ko ong•atanio a•dokni Chief Minister Conrad K Sangma parakataha.
Ia program-ko ong•atanio a•dokni Chief Minister, tom•anio bak ra•giparangna aganprakengon, buring bolgrimrangko ripingna aro jillarangko rongtal an•tale rakkina sorkari, ‘Mission Mode’-o kamrangko a•bachengataha ine aganaha.
Shillong songjinmani Marten jabol galramo, kam ka•giparangko bariatanichi aro bio-mining-ko a•bachengate skatang galgimin jabolrangoni atakode rongtalatna man•aha ine janapatengon, Tura, Jowai aro a•dokni gipin jillarangoba ia apsan ja•kurangko de•anggen ine Sangma aganaha.
2027 bilsio sokachakna sienggipa National Games-na sorkarini a•bachengatgipa ‘Mission Clean Shillong 2027’-ni gimin janapatengon, ia kamara jabol chimonge galaniko nambatatna, skatang galgimin jabolrangko rongtalatna aro jillarango rongtal an•talaniko rakkina a•bachengatgipa kaman ong•enga ine Chief Minister parakataha.
Batanggimin bilsisnini gisepo hectare 22,000-mang ong•na sipile buring bolgrimrangko man•dapaha aro pang crore 2-mang ong•na sipile bol chararangko ge•aha ine janapatskaengon, da•o mikkang bilsi 5-ni gisepo buring bolgrimrangko hectare 40,000-ona bariatanian sorkarini miksongani ong•enga ine Sangma aganaha.
Payment for Ecosystem Services (PES) scheme-ni chu•sokgipa ong•aniko talatangengon, dingtang dingtang songrangna sorkari gong crore 42 tangkarangko suale, hectare 52,000-na baten buring bolgrimrangko ripingna kam ka•enga ine Chief Minister parakataha.
Green Meghalaya Plus-ni ning•o hectare lak 1 buring bolgrimrangko ripingna nisanko done sorkari, hectare-prakon gong 20,000-ko on•anggen ineba ia tom•anio Chief Minister parakataha.
Ia bol ge•ani program-ko ong•atanio, Meghalaya Legislative Assembly-ni Speaker Thomas A Sangma, Deputy Speaker Timothy D Shira, Cabinet Minister-rang, Assembly Secretariat-ni official-rang, Forest department-ni official-rang aro gipinrangba dongpae bak ra•angtokaha.
Na·simang ia video-koba nina man·gen:
Na·simang iakoba poraina man·gen: Raja Raghuwanshi aro Sonamni bidingo CBI chi sandirokatchina nokni manderang Prime ministerna seachi uiata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
