A·doko songpanggiparangni aganenggipa Kokborok ku·sikna Bengalini pal Roman oikor-ko jakkalchina dabiange TIPRA Motha-ni chatr o dol, Indigenous Students Federation (TISF)-ni mija Butbar salo Tripura a·dokni skotong Agartala songjinmao tom·tome jingjengataniko ong·atangani ja·mano kajia-golmalona sokangskaaha ine koborko man·soaha.

Meghalaya a•doko drugs ba pekatgipa samrangko jakkalani aro niam gri badingsrukanirang batroroengani gimin iandake songsalna ong•sigipa kamko champengna man•na gita Bristibar salo a•dokni Social Welfare department, Shillong All Faiths Forum (SAFF) baksa tom•e chanchirimangaha.

G20-ni bak gita South West Garo Hills a•jaoba Janbhagidari-ni program-rangko Bristibar salo, South West Garo Hills Samagra Shiksha Abhiyan (SSA)-ni District Mission Coordinator office-ni gita Education Ministry baksa nangrime Ampati-ni Multi Facility Centre-o ong•atangaha.

CEM-ni parakatani gitade, GHADC-ko NGCO-ni office picketing ka•aniara 2015 bilsio High Court-ni dongimin niamko pe•ani gitaba ong•ahachim aro iandake GHADC-ni kam ka•aniko champenganiara niamni a•palo ong•achim.

Iani bidingo Butbar salo, koborni manderangna aganangengon, KJFWRA-ni padot, Mitchel Wankhar, Andhra Pradesh a·dokchini na·tokrangko a·dokona ra·napbana skangan porikka ka·e nichengesa ra·bagenchimoba, na·tok ra·napbaaniko sorkarini champengatanina an·tangni suk ong·gijaniko parakangskaaha.

Ia dabianirangko knachakgija dongchipgenchimode mikkangchi GHADC-ni kosako rakbate jingjengatanirangko dakanggen ineba NGCO-ni president parakataha.

West Jaintia Hills a•jani Khanduli jolo, Jaintia aro Karbi manderangni gisepo so•sojengjeng ong•anirangko nikna man•rongengani gimin Assam-ni Minister, ia kattarangko aganaha.

A•dok damgnini regional committee-rangan, an•tangtangni report-rangko August jani gisepo sorkaritangtangna on•na gitaba ia tom•anio tik ka•e donangaha.

A·briko rama cho·sotgipa biapo a·arang gital dake rurongtaiani gimin ramako nirokenggiparangni a·ako salgale galkujana kingkingde National Highway-6 gita songreaniko ba garirangni re·ruraaniko adita somoirangna dondipatchengaha.

Iani bidingo, sianggiparangko rate porikka ka·atani kamrangko ka·chakatengaha ine Imphal East-ni SP Shivkanta Singh koborna parakataha.