Shillong, June 4: Central Board of Secondary Education (CBSE)-ni second language subject-rango Khasi aro Garo ku•sikrangkoba chapatna dakchakchina gita Shillong-ni Congress MP Vincent H Pala, Union Education Minister Dr Ramesh Pokhriyal ‘Nishank’-ko didiataha.
“Meghalaya a•dokni bi•sarangba bida budiko nambate skie ra•na man•na gita Khasi aro Garo ku•sikrangkoba second language-na ra•chakgimin subject-rango chapatchina anga nang•ko mol•molenga,” ine Sukrobar salo Dr Nishank-na seatgipa chittio Pala parakataha.
Shillong MP-ni parakatani gitade, Khasi aro Garo ku•sikrangara Meghalaya a•doko songdongenggipa manderangni sena aro aganna jakkalgipa ku•siksan ong•aigija, salgro salaramni gipin a•dokrang, jeon Khasi aro Garorang bang•en songdong a•chatokenga, uamangni jakkalgipa ku•sikrangba ong•engachim.
Bangladesh a•songoba Khasi aro Garo ku•sikrangko agangipa manderang bang•en donga ineba Pala janapataha.
Meghalaya a•doko mandeni jelbra jelsuania lak 35-mang ong•a aro ianoni 47 percent-de Khasi ku•sikko agangiparang, 30.86 percent-de Garo ku•sikko agangiparang aro bangkide gipin ku•sikrangko jakkalgiparang ong•a ine Shillong-ni MP parakataha.
Pala-ni parakatani gitade, gital chapa ka•taigipa CBSE-ni curriculum-o Khasi aro Garo ku•sikrangkode watchanggale komibatgipa jatrangni jakkalgipa Mizo, Tangkhul aro uandakgipa ku•sikrangkosa man•chapatskaahachim.
“Mizo ku•sikko agangiparangde lak 12-mangsan ong•aia aro Tangkhul ku•sikko agangiparangba lak 1.83-mangsan ong•aia,” ine Shillong MP talataniko on•angaha.
