Tura, Nov 9: Garo Heritage Village aro Wangala A·dam, Chibragre, West Garo Hills-o ong·atgipa chang 49-gipa Hundred Drums Wangala Festival 2025, Sonibar salo namen an·saobee matchotangaha. Hajalni hajal manderang re·bae A·chikrangni dakbewalrangko doka-dam·achi, chrok-mesaanirangchi aro niam-retirangko ja·rikanichi maniangaha.
Ia maniani bon·kamgipa bak-o tom·bimonganiona Meghalaya sorkarini Minister of Agriculture & Farmers’ Welfare, Fisheries, and Tourism, Timothy D. Shira mongsonggipa sokgipa ong·e re·baaha. Unbaksana, Minister of Border Areas Development, Home (Civil Defence & Home Guards), and Excise, Brening A. Sangma, Minister of Animal Husbandry & Veterinary, Arts & Culture, Legal Metrology, and Printing & Stationery, Sanbor Shullai aro, Assistant Director, Ministry of Tourism, India Sorkari , V. S. Kumaran, aro gipin agipi dilgiparangba ia manianiona re·baaha.
Opposition-ni dilgipa Dr Mukul Sangma aro Mahendraganj-ni MLA Sanjay Sangma-ba ja·mano ia manianirangona re·bae bak ra·angaha.
Ia tom·bimongani a·bachengo dingtangmancha sokgiparangna memento-rangko on·anirangko dake, Wangala-ni theme song- Dimdim Dimchong Dadichong-ko ring·angaha. HDWFC-ni Chairman Ronald Rikman Sangma jinmana rimchaksoani kattarangko aganatengon, pilak dakchakrimgiparangko mitelenba, ia manianiko ong·atanichi tourism-ko gipatna, meli-nangrimaniko ra·bana aro chadamberangna jattangni dakbewalrangni bidingo u·ianiko on·na dakchaka ine janapangaha.
Uandake, Meghalaya a·dokni jatrangni dakbewalrangko tangchaatpilna ja·ku de·ani aro A·chikrangni niam-retirangni ong·baani gimin mongsonggipa sokgipa Timothy D. Shira talate on·angaha. “Skangni salrango Meghalaya Assam a·dokni ning·o ong·engpition, an·chingni su·ugipa aro dingtangmanchagipa jatni dakbewalrangko ripingna mamung ja·ku de·anirang dongjachim. Meghalaya a·dokko man·ani ja·manosa an·chingni dilgiparang Captain Williamson A. Sangma-ni dilanichi an·chingni jatni dakbewalrangko ripingna 1976 bilsio Hundred Drums Wangala Festival-ko a·bachengataha,” ine ua aganangaha.
Indake ua a·doko mingsa mongsongbatgipa manianiko a·bachengatanina Captain Williamson A. Sangma aro unomiting Arts andCulture-ni Minister ong·enggipa Sendfort K. Marak-ko mitele aganangaha.
Wangala-ara mi-misi akmanani ja·mano manianiko dakaoni Garo Hills gimiko aro gipin biaprango A·chik jatni dakbewalrangko apalbate manianirangko dakaniona ong·baaha ine ua talatangaha. “Da·alo Wangalaniara torom ba biapni bidingosan ong·aija. Ian pilak A·chikrangko nangrimatgipa jatni dakbewalrangko maniani ong·a,” ine Shira aganangaha.
Politics-o an·tangni kam ka·ani golporangko gisik ra·atpile, 2005 bilsio Resubelpara-o Wangala-ko manianiko ong·atanichi jattangni chrok-mesaani aro dama ongrimanirangko ua namnikbatna a·bachengaha aro an·tangan chrok-mesaaniko skie ra·na chanchiaha ine ua ka·dingsmite aganangaha.
Wangala-ko chrokanio A·chikrangni ja·ku ga·anirang aro chrokani bewalrangko namedake ja·rikchinaba ua Byrnihat aro Dalu-o chrokgipa dolrangko agane on·aha aro, Wangala-ni gun-ara manianiko dakaniosan ong·aija indiba mikkangchini chasongrangna jatni dakbewalrangko ripinganioba ong·a ine ua aganangaha.
Wangala-ko a·songo aro a·gilsak gimiko niksengataniko man·enganina rasong chae, ia manianiko gipatna aro nambatatna aro bilsiantian dal·batatna nangenga ine ua aganangaha.
Tourism-na nambata cholrangko ra·bana man·gen ine, Asanang-ni Garo Heritage Village-o jatni chrok-mesaani aro doka-dam·anirangko attamrango ong·atgenchimode, Garo Hills-ona rona re·bagiparang bilsi gimikan Wangala-niko nike an·saona man·gen ine ua janapangaha.
Uandake salo manianirango Misi Saljongko mitelna Cha·chat So·aniko dake, uni ja·mano dol chikkung chrokgiparang chrok-mesae susaangaha. Maniani mongsonggipa bak, chong·motan, bol ritchasa damarangko ongrimatanirangko dakon, jinmarang kusi ong·e chrike an·senge roaha.
Wangala chrokaniko susaanio Chidaogreni chrokgipa dolrang chegipa ong·aha, uni ja·mano Gondenggre 1st Runner-up aro Sadolbra 2nd Runner-up ong·angskaaha. Attamo an·saobegipa doka-dam·ani aro India-ni dingtang dingtang mingsinggipa git ring·giparang baksa joltangni git ring·giparang biapko ra·e manianiko matchotataha.
Pilakkon dakmano, dama ongrimanirang jripangaha, aro ia 49-gipa Hundred Drums Wangala Festival changsatai A·chikrangni meli-nangrimani, aro chasongni chasongna jatni dakbewalrangko ripingbaani aro jatni tanggipa gam ong·aniko mesoke, re·baenggipa bilsio bilsi 50 ong·aniko manina nichaksoaniko on·enga ine an·ching nikatna man·gen.
Na·simang iakoba nina man·gen:
Na·simang iakoba poraina man·gen: Trinity College London chang 11-gipa Theory Exam-ko Tura-o ong·ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
