Shillong, Feb 21: Chengonin Meghalaya aro Congress dolni gisepo meli-nangrimani donga ine Mongolbar salo, Congress dolni dilgipa aro gitcham minister Sachin Pilot parakataha.
Mongolbar salo ua, Meghalaya Assembly election-na campaign ka•na gita Shillong-ona sokbaani ja•man kobor ra•timgipa manderang baksa agangrikengmiting somoio ia kattarangko aganaha.
Skangonin Meghalaya a•dokni manderang, Congress dolo pangchakgiparang ong•achim ine janapatengon, ia changoba Congress dol, Meghalaya a•doko sorkariko rikpiltaina man•gen ine Pilot, an•tangni ka•dongchakenganiko parakataha.
Tangka paisa jakkalsretanirangna BJP aro NPP dolrang, dolsa dolgipinko matnanggriktokenga ine janapatengon, bilo ong•angkuna gita ia dolrang da•oba nangrimpiltaienga ine Congress dolni dilgipa parakataha.
Pilot-ni parakatani gitade, ma•mongo BJP, bilsichet atana sorkario ong•engahachim indiba indita bilsirango uamang, namroro silroroaniko ra•baani pal, a•songko bak dakna aro jat-torom basenasa jotton ka•skaahachim.
Ma•mong sorkariko chalaian baksana Meghalaya a•dokoba BJP, NPP-chi dilgipa MDA sorkarini bak ong•paachim indiba uamang manderangni nangnikanirangko chu•sokatna man•jaha ineba Pilot aganaha.
Meghalaya a•dokni manderang Congress dolo pangchakgiparang ong•achim ine janapatengon, ia election-o gital candidate-rang baksana bilakgipa candidate-rangsa susaengani gimin MPCC-ni dilgipa Vincent Pala-ni kamko ka•dilanichi chu•sokgipa ong•telgen ine Pilot, an•tangni ka•dongchakenganiko parakataha.
