Shillong, Nov 12: Meghalaya a•doko chubata gadango poraianiko dontonganirang batroroengani gimin chadamberangni poraiani dontonganiko komiatna aro a•dokni pilak biaprangon lekka pora on•aniko nambatatna gita sorkari raken kamko ka•enga ine Budbar salo, Meghalaya a•dokni Education Minister Lahkmen Rymbui parakataha.
Budbar salo, State Higher Education Council (SHEC)-ni tom•aniko ong•atani ja•man kobor ra•timgiparangna talataniko on•angengon, 2018 Assembly Act-ni ning•o songgipa SHEC-ko da•o sorkarina agan-ku•pattie on•na aro kamrangko nirokna gita tangatpiltaienga ine Rymbui parakataha.
Chubata gadango poraianiko dontonganirang batroroaniara jajrengchakna nanganiko ong•atenga ine janapatengon, Shangpung, Khliehriat, Nongtalang, Mawphlang, Mawsynram, Rongjeng, Patharkhmah, Umsning, Dalu aro Chokpot-o manderangni college-rangko kulie on•anichi aro Captain Williamson Sangma State University baksana engineering college-ko kulie on•anichi MDA sorkari, manderangna bida budi ra•ani cholrangko bariataha ine Education Minister aganaha.
Mitam chatro chatrirang, tangka paisarangni a•selba poraiako dontongna gita draatako man•enga ine janapatskaengon, iani giminsa a•dok sorkari scholarship-rangkoba bariatna nangskaaha ine Rymbui aganaha.
Rymbui-ni aganani gitade, 2020 bilsio a•dok sorkari, A, B, C, D group-rangna scholarship-ko gong 15,000-oni gong 35,000-ona, primary-na merit scholarship-ko gong 100-oni gong 500-ona aro upper primary-na merit scholarship-ko gong 150-oni gong 700-ona bariataha.
Ia bilsio a•bachengatgipa Chief Minister’s Scholarship Scheme-ba, bojarangko komiatna gita dakchakani ong•gen ine ua aganaha.
Class XII-ko pass ka•gipa chatro chatrirangoni 82.3 percent-de, Science aro Commerce stream-rang dongjani a•sel Arts stream-ko ra•na draatako man•enga ine janapatskaengon, iani giminsa a•dok sorkari, pilak sorkari secondary skulrangkon higher secondary-ni gadangona ra•doataha ine Education Minister talate on•angaha.
Na·simang iakoba nina man·gen:
Na·simang iakoba poraina man·gen: ‘One NE’-ko bikotanichi Congress-na kenna nangani dongja: MPCC
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
