Agartala, Jan 17: Tripura a·doko Congress dolni state president Pijush Biswas-ko chadrapahani gimin opposition Congress dol, Sombar salo konta 12-na ‘strike’-ko ong·atenga. Tripura a·dokni Congress president Pijush Biswas-ko BJP dolna kam ka·enggipa manderang kragija dake chadrapaha ine Congress dol matnangenba, Sombar salo konta 12-na champenganirangko dakangna manchiangaha.
Indake ong·engon, ia a·sel ong·aniko Tripura a·doko sorkariko dilenggipa BJP dol jegalatskaenba, Congress dolni konta 12-na ‘strike’ ong·atna manchianiko ra·galpilchina didiatskaaha.
Tripura Pradesh Congress-ni vice president Tapas Dey-ni parakatani gitade, Congress dolni state president Biswas-ko BJP-na kam ka·enggipa manderang baksana ong·gija dakgipa manderang, kragija dake chadrapaha aro ia chadrapanio Congress dolna kam ka·enggipa saksni manderang saknaanirangko man·na nangahachim.
Tripura a·dokni Congress president aro dolna kam ka·enggipa manderangko, mijal Sonibar attamo BJP-na kam ka·enggiparang, Tripura a·dokni Sepehijala a·jao donggipa Bishalgarh-o chadrapaha ineba Congress dolni state vice president Tapas Dey aro Congress dolni gipin dilgiparang matnangataha.
“Congress dolni state president aro Congress dolna kam ka·enggipa manderangko police-rangni mikkangon, BJP dolna kam ka·enggipa bang·bea manderang chadrapaha. Congress dolni state president-ko kragija dake chadrapaniko jegalna gita chinga Sombar salo konta 12-na a·dok gimikon champengatanirangko dakna manchiaha,” ine Dey, kobor ra·timgiparangna parakataha.
Congress dolni dilgipako chadrapani ja·man Sonibar walon Congress dolni dilgiparang FIR-ko ka·ahachim indiba da·ona kingkingan police-rang, chadrapgipa manderangni kosako ja·kurangko de·kujaenga ineba Congress dolni dilgiparang parakataha.
Chadrapako man·gipa Tripura a·dokni Congress president-ba ja·mano kobor ra·timgiparang baksa agangrikengon, BJP dolni ong·gija dakgipa manderang uko so·otna miksongesa silgittang aro gol·dikrangchi uko chadrapahachim aro uni gariko nosto ka·aha ine parakataha.
