Tura, April 15: Meghalaya a•dokni Chief Minister Conrad K Sangma aro Power Minister James K Sangma-ni jongsari sakgittam, ia chang GHADC election-o susae chegipa ong•tokaha.
NPP-ni candidate Anseng A Sangma, Asanang constituency-o susae chegipa ong•aha, uni jonggipa Grahambell A Sangma-ba Jengjal constituency-oni susae chegipa ong•aha aro NPP-ni sakgipin candidate aro uamangni jonggipa Rakesh A Sangma-ba Babelapara constituency-o susae chegipa ong•aha.
Babelapara constituency-o Gambegre MLA aro NCP-ni candidate Saleng A Sangma 5437 vote-rangko man•aha aro NPP-ni candidate Rakesh A Sangma, 6376 vote-rangko man•e, Saleng-ko 939 vote-rangchi cheaha.
Asanang-o NPP-ni candidate Anseng A Sangma, 6335 vote-rangko man•rikskae, 5746 vote-rangko man•rikgipa Congress dolni Adamkid Sangma-ko 589 vote-rangchi cheskaaha.
Jengjal constituency-oba NPP-ni candidate Grahambell A Sangma, 6531 vote-rangko man•e, 6447 vote-rangko man•rikgipa Congress dolni Levastone T Sangma-ko 84 vote-rangchi cheskaaha.
Indake ong•engon, Nogorpara constituency-oba Chief Minister Conrad K Sangma aro Power Minister James K Sangma-ni ma•drangoni Linekar K Sangma chegipa ong•aha.
Nogorpara-o NPP-ni candidate Linekar K Sangma, 7625 vote-rangko man•e, 5696 vote-rangko man•rikgipa Congress dolni candidate Kansan Sangma-ko 1929 vote-rangchi amchepataha.
