Tura, April 15: GHADC election-o West Garo Hills a•jani Rochonpara constituency-o Independent candidate Arbinstone Marak, 1881 vote-rangchi GHADC-ni chief executive membor (CEM) Dipul R Marak-ko chena man•aha.
Arbinstone Marak, skanggipa changna election-o susae gimik 6871 vote-rangko man•rikaha aro NPP-ni candidate Dipul Marak, 4990 vote-rangkosan man•rikskaaiaha.
Kobor on•timgiparangni u•iatani gitade, Arbinstone Marak, saksa a•dokni Chief Minister aro NPP-ni national president Conrad K Sangma baksaba meligipa ong•achim indiba ua GHADC election-o susana gita party tikitko man•rikjahani gimin Independent candidate ong•e susaskaahachim.
An•tangni cheani ja•mano kobor ra•timgipa manderang baksa agangrikengon, ua NPP dolnan kakket ong•e dongangkugen aro GHADC-o gital executive committee-ko rikna gita NPP baksa bakrimgen ine Arbinstone Marak parakataha.
Uo bebera•e seokahani gimin ua an•tangni constituency-ni manderangkoba mittelpilangaha.
Koborko on•ani gitade, ua NPP-na kamko ka•gipa mande saksa ong•e bilsi 15 batpile Conrad K Sangma baksa apsan kamko ka•rimengahachim.
2004 bilsini Selsella by-election, 2008 bilsini general election aro 2013 bilsini general election-o Conrad Sangma-ni susaani somoirangoba ua kamko ka•giparangoni mongsonggipa mande ong•achim.
