23.8 C
Tura
spot_img

Dr. Donkupar Roy sagini bimangko nitoe noksa salgiminko Assembly-o oprake on·anga.

Must read

Shillong, Nov 5: Meghalaya-ni agan-chalaitimgipa aro skotong Minister gitcham Dr. Donkupar Roy sagini mikkangko nitobee noksa salgiminko da’alo dakchakgipa skotong minister Pa Prestone Tynsong aro dakchakgipa agan-challaitimgipa Pa Timothy D. Shira-maangni dongpaanio skotong minister Pa Conrad K. Sangma, agan-challaitimgipa Pa Metbah Lyngdoh, warachakgipa dolni dilgipa Dr. Mukul Sangma-maang oprake on·angaha.

Ua noksako da·omitingde, Rilbong, Shillong-o donggipa dikdiksana jakkalenggipa Meghalaya Legislative Assembly-o donchengenga, uni ja·man Mawdiangdiang-o rikenggipa pangkamgipa Meghalaya Legislative Assembly-ona ra·jitangskagen.

Tom·anio agananengon,  sianggipa Dr. Donkupar Roy-ni mikkangko nitobee salgipa noksako donna gita dakdil-ka·dilanina Assembly Secretariat-oni gimikkon aro Meghalaya Legislative Assembly-ni agan-challaitimgipako skotong minister Pa Conrad Sangma dingtangmancha mitele aganaha.

“Gital assembly nokni ning·arang aro gipin bakrangni gimin chanchiengmitingo a·dokni niksenggipa dilgiparang aroba assembly-ni gitcham agan-challaitimgipa dilgiparangni noksarangko aro uamangni mikkangrangko nitoe noksa sale donani gimin mande ra·ako man·na kragipa agan-challaitimgipa Pa Metbah Lyngdoh chanchiao naataha aro ia apsankon chinga dingtangmancha uamangna on·kange gallery-ko donani giminba tik ka·jolaha,” ine skotong minister iako agane, Lok Sabha  aro Rajya Sabha-rango dakbaenggipako ja·rike chinga iako dakanggen ine u·iatjolaha.

Dingtangmancha on·kanggimin gallery-ko donachi assembly-ni memborrang aro gital chasongni manderangko didiatani gita ong·gen. Uasan ong·aija, assembly-ona jemangan re·bagen uamangba a·doko sawarang dal·batgipa gadango donge dangdike on·angahachim iani gimin ma·sie ra·jolnaba man·gen, ine Pa Sangma agandapaha.

Batanggimin bilsirango Meghalaya-ko bimang ong·atanio namen gisik ra·na krabegipa ong·anggiminko mesoka baksana a·dokni ma·ambiko talatani giminba da·o gital rikatenggipa assembly noko dingtangmancha manderangni nie u·ie ra·chakram biapba dongjolgen ine ua u·iataha.

A·gilsakni pilak parliament nokrangchina re·ange nigenchimode, iandake gisik ra·na krabegipa ong·anggiminrango pangchake nitobee tarie donanirangko nikaigen. Chinga ua apsankon chingni assembly-o ja·rikpae dakna nangnikenga, jedakode chasong damberangba a·songna ka·oksie dangdike on·anirangko skie ra·e uarangko daksningpana man·gen. Apsandake, saoba mande assembly-oniko Dr. Don sagini noksako nion uni on·kanganirang, kamrang aro gunrangni gimin uamangko gisik ra·atpiltaia gita ong·gen ineba skotong minister aganaha.

spot_img

More articles

spot_img
-->

Latest article