Shillong, Feb 11: Tangka-paisarang chu·ongmanjani a·sel Education department dingtang dingtang neng·nikaniko man·genchimoba skigiparangna dormaharangko on·anion Education department bilsiantin hajal krorrangna baten tangka-paisarangko jakkalenga.
Iani gimin Education department-o man·gipa segate rakkigimino janapani gitade, a·dok gimikoni ge hajal 13,236 skulrango skie on·enggiparangna dormahako on·anio gong kror 1,455.42 mangni gita tangkarangko jakkalenga ine nikna man·aha.
Skigiparangna dormaharangko on·anio sokari tangka-paisarangko jakkalbatenga ine talatengon, a·dok gimikni ge 8,014 sorkarini skulrang, deficit skulrang, deficit pattern aro Adhoc skulrango skie on·enggipa sak 26,335-mangna gong 1,144.43 tangkarangko jakkalenga. Ge 2539 sorkarini lower primary skulni sak 2,479 skigiparangna gong kror 319.97, ge 56 upper primary skulni sak 402 skigiparangna gong kror 30.94, secondary skulrangni sak 220 skigiparangna gong kror 3.62 aro ge 25 higher secondary skulni sak 468 skigiparangna gong kror 61.65-mangko jakkalenga ine Education Minister Pa Lakhmen Rymbui agan-talataha.
Deficit skulrangni ning·ogipa, ge 1,920 LP skulrangna gong kror 229.85, ge 136 UP skulrangna gong kror 64.25, ge 121 secondary skulrangna gong kror 186, ge 17 higher secondary skulrangna gong kror 16,84, ge 25 deficit pattern LP ba UP skulrangna gong kror 1.62 aro ge 9 secondary skulrangna gong kror 6.99-rangni gita tangka-paisarangko jakkalenga ineba minister u·iataha.
Adhoc skulrango, gimik ge 1,225 LP skulrangni sak 2,450 skigiparangna gong kror 35.28, ge 884 UP skulni sak 3,376 skigiparangna gong kror 66.84, ge 339 secondary skulni sak 2,248 skigiparangna gong kror 51.09 aro ge 69 higher secondary skulni sak 428 skigiparangna gong kror 12.29-rangko jakkalenga ine Pa Rymbui janapataha.
“Ge·gni skulrango science-ko skie on·na tangkakoba chinga on·enga, indake ge 602 secondary skulrangna gong kror 15.47-mangko jakkalenga, Hindi ku·sikko skie on·na ge 153 secondary skulna gong kror 2.64-ko jakkalan baksa, sak 1,521 4th teacher ba skigiparangna (japrakni dormaha 12,000 ka·e) gong kror 21.90-ko aro skie on·ani a·bao sak 54 on·kange skie on·enggiparangko man·chape (japrako 15,000 ka·e) gong lak 97.20 -rangko jakkalenga. Ge 710 pre-primary skulo skigiparangnaba sorkari gong kror 6.32 tangka-paisarangko jakkalenga,” ine ua talatkuaha.
Una agreba, a·dok gimikni ge 5,222 SSA skulni sak 12,906 skigiparangna dormaha on·anioba gong kror 310.99 tangka-paisarangko sorkari jakkalenga. Ianoni, ge 2,907 LP skulni sak 5814 skigiparangna gong kror 132.86-ko, ge 2242 UP skulni sak 6,727 skigiparangna gong kror 165.42-ko aro ge 73 secondary skulni sak 365 skigiparangna gong kror 12.70 tangkarangkoba a·dok sorkari jakkalenga ine minister taldapataha.
