Shillong, Jan 13: Meghalaya a·doko ru·utgijan Assembly election ong·nasiengani gimin, a·doko pilakni gita tarisamsoanirangko nirokna Election Commission of India (ECI)ni manderang jeon Chief Election Commissioner, Pa Rajiv Kumar-ko man·chape, Election Commissioner-rang Pa Anup Chandra Pandey aro Pa Arun Goel-maang a·dokona salgnina wenbaenba, Sukrobar salo pilak political party-rang, national party-rang, a·joltangni party-rang, a·dokni party-rangko grongange uamangni neng·nikanirangko aro agan-ku·pattianirangko knatime ra·angaha.
Dingtang dingtang political party-rangko grongani ja·mano, district magistrate-rang, SSP-rang aro a·dokni officialrangko gronga baksana, central agency-rang, a·dokni chief secretary, DG aro gipin official-rangkoba grongjolaha.
A·dokni Electoral Roll-o biming segatgiminko mija January 5 tariko parakatgimin gitade, lak 21.61 mangna baten vote pu·onggiparangni bimingrangko segatahachim jeon me·asarangna bate me·chikrang bang·bataniko nikna gita man·aha. Uandake, a·dokoni dam 60 assembly constituency-rango gimik-gimang ge 3,482 polling station-rangko dongen aro polling station ge·prakon sak 620 mangni gita vote pu·onggiparang dongna ka·dongenga, unbaksana, 50 percent polling station-rangode webcasting facility-ba donggen ine koboro janapataha.
Be·ennni gita bilgrigiparangkoba eleksino dingtangmancha bak man·chapatengon, Meghalaya a·doko sak 7,478 mangni gita uandakgipa manderangni bimingrangko segataha. Bilsi 80 ong·gipa ba una batgipa sak 22,658 pu·ongiparangni bimingrangko segatgipaoni sak 290 mangde bilsi 100 ong·giparang ong·toka. Uandakgiparangko dingtangmancha mande ra·china aro biapko on·china gita commission, seachi u·iatmanha ineba CEC janapataha.
Vote pu·onna bilsi chu·ongsrangkugijagipa sak 950 chadamberangni bimingrangko bilsi 17 batgipani ning·o advanced application-o segataha ine u·iatengon, “democracy-ni gamchatanirangko aro dakbewalrangko a·bachengon uamangna skianirangchi ma·siate on·na gita miksonge re·chakatengani gimin, jensomoio uamang bilsi 18 gapon chinga uamangko vote pu·onatgen ine Kumar talataniko on·angaha.
Chief Election Commissioner-ni janapatani gita, India gimiko me·chikrangko bilgnangatna pangchakaniko done kamko ka·enganio, re·baenggipa eleksinna ge 120 booth-rango me·chikrarako dingtangtang kamrango donatna gita man·aha, je booth-rangon polling officerrang, presiding officerrang aro police-rang mangmangba me·chikraraan ong·gen ine Commissioner u·iataha.
A·doko songdonggipa namen a·gipibegipa buchuma-budeparangna ianpakni eleksino vote-rangko pu·onchina gita Commission, minggipin cholko donsoaha ine u·iatengon, mainiba a·sel polling station-china re·angna nangnikja ong·ode, Commission, uamangni nokrangona re·ange vote-rangko ra·eskagen ine janapatengon, uamangni vote-rang maidake darangni nikgijao ba srik-mittino ong·skagen ine Commissioner iani gimin talataniko on·angenba, buchuma-budeparangko darangba drana man·jana gita commission-ni manderang baksana political party-rangni political agent-rang ba candidate-rangkoba re·angchapna gita on·gen ine janapatan baksa, ia pilakko jachipchange ra·gen aro u·iatsamsoaniko dakgen ineba Commissioner talatjolaha.
CEC-ni u·iatani gita, constituency damprako vote pu·onggiparang namen komibatenggipa ge·bonga booth-rangkoba chinga ma·simanaha aro uandakgipa biaprango maini a·sel komiaengachim, CEO-ni nirokatani ning·o pilak district election officer-rang ma·sie ra·na jotton ka·enga ine u·iatangenba, ianpakni eleksino maming cha·bokani gri kraa bewalo lekka pu·onaniko ong·atna man·na gita tarigimin application-ko jakkale jeni giminba apoti ka·anirangko dakna cholrangko on·e chasongni kri technology-ko jakkalachi a·songni manderangko bilgnangtenga ineba commissioner agandapataha.
