Guwahati, July 27: Sombar salo Assam aro Mizoram a•dokni sima jolo dolgni dinggrikanichi Assam-ni sipai sakbonga aro ramram mande saksa siangan baksana sak 60 manderang saknaanirangko man•ani ja•man Forest Reserva ba a•kanggimin buring bolgrimrango niam gri napdrana man•jana gita ia buring bolgrimrangko chel•chakchina gita Supreme Court-ko didigen ine Mongolbar salo, Assam a•dokni Chief Minister Himanta Biswa Sarma parakataha.
Dolgni dinggrikanio sianggipa sipairangna ua dingtangmancha Silchar-o bon•kame mande ra•pilskaanikoba dakangaha.
Iani bidingo kobor ra•timgiparangna talataniko on•angengon, a•dok damgnini gisepo donggipa buring bolgrimrango ramarangko tarienga aro a•ba cha•na gita o•engako sattelite-ni noksarango nikna man•enga aro iako Assam sorkari on•chana man•jawa ine Sarma parakataha.
“Ia buring bolgrimrangko chel•chakna gita chinga Supreme Court-ko didigen,” ine ua aganaha.
Sombar salo Mizoram a•dokni manderang baksa dinggrikgipani bidingo talataniko on•angengon, “A•dok damgnini gisepo meligrikgijaniara a•ani gimin ong•ja indiba kanggimin buringrango napdraengani giminsa ong•enga. Chingonide buringrango napdrae songdong a•chagiparang dongjachim indiba Mizoram a•dok chingna sakkiko on•na man•genchimode chinga buringrango songdonggiparangko ta•raken a•rikgalgen,” ine Assam-ni Chief Minister parakataha.
Assam-ni a•ao gipin a•dokrang napdrana man•jawa ineba Sarma aganaha.
Sombar salo a•dok damgnini gisepo so•sojengjeng ong•angani ja•man, ia border post-oniko sipai dolrangko ra•galchina gita ma•mong sorkari, a•dok damgnina ge•etaniko on•angahachim.
“Chingade sipairangko ra•galataha indiba Mizoram-de ra•galkujaenga. Chinga chingni sipairangko border post-oni metre 100 chel•ao donskaenga,” ine Sarma parakataha.
Simarango chel•chakaniko on•na gita Assam sorkari, dolgittam commando-rangko Mizoram a•dokni sima jolrango donggipa Cachar, Karimganj aro Hailakandi-o donatgen ineba Assam Chief Minister parakataha.
