Shillong, July 27: Mongolbar salo Meghalaya a•dokni Chief Minister Conrad K Sangma aro Deputy Chief Minister Prestone Tynsong, a•dokni gital MCS officer-rang baksa Meghalaya Secretariat-ni Yojana Bhawan-o agangrikangaha aro ia tom•anio MATI-ni Director Ram Kumar-ba dongpae bak ra•angaha.
Ia tom•anio a•dokni Chief Minister, gital MCS officer-rangna aganprakengon, ia sal somoirango a•songo songdongenggipa manderangoni bang•batan chadamberangsa ong•a aro Meghalaya a•dokba dal•drobaenggipa a•doksa ong•a ine janapatenba, dambemiting somoion administrative officer-na seokako man•aniara namen katchaani ong•a indiba dal•begipa daitoko chilna nanganiba ong•aha ine parakangaha.
“Ia sal somoirango chadamberangni nangnikanirangara namen dingtanga aro na•simangan dambe officer-rang ong•e, an•tangtangni kamrangko ka•anioba chadamberang baksa nambate kamrangko ka•rimna man•gen,” ine Sangma aganaha.
A•dokni namroro silroroaninade pilak kaman mongsonggipa ong•aia ine janapatengon, kamtangtangko ka•anio pangnan bamgiparang ong•china gita Chief Minister, gital MCS officer-rangko didiangaha.
Iana skang, a•dokni Deputy Chief Minister Prestone Tynsong-ba gital MCS officer-rangna agan-ku•pattianirangko on•angengon, manderangna dangdike on•anio, pangnan bamgipa, kakketgipa aro kamtango bimchipgipa ong•china didiangaha.
Ja•mano gital MCS officer-rang, a•dokni Chief Minister aro Deputy Chief Minister baksa dingtang dingtang kamrangni bidingo agangrikangaha.
